Øvre Telemark tingrett

Regjeringa ved Senterpartiet og Arbeidarpartiet har foreslått å dele Telemark tingrett i to domstoler. Sorenskrivar i Telemark Andreas Skoe Cederkvist og fem andre domstolleiarar synest det er eit dårleg framlegg.

Eg vil tvert imot gratulere regjeringa med eit distriktsvennleg framlegg. Alternativet med dagens struktur styrt frå Skien ville truleg vore at rettsstadane på Notodden og Kviteseid over ein 10-års periode gradvis ville bli bygd ned. Domarane ville budd i nedre del av fylket og pendla opp til rettsmøta.

Med framlegget så sikrar vi at øvre Telemark med om lag 50 000 innbyggarar, eit variert næringsliv, 20 000 fritidseigedomar, tusenvis av landbrukseigedomar og 2/3 av arealet i fylket får ein sjølvstendig domstol. Det vil vera ein domstol med 4-5 embetsdomarar og ein dommarfullmektig. Det er ein framtidsretta domstol. Gratulerer justisminister Emilie Enger Mehl (Sp) og Telemarks-representantane Åslaug Sem Jakobsen (Sp) og Lene Vågslid (Ap).