Vinjekalenderen 2024
Endeleg får elevane på tiande trinn sjå resultatet av prosjektet «Foto og dikt» som dei arbeidde med då dei gjekk i 9. klasse.
Vinje Mållag inviterer kvart år elevane i 9. klasse på alle skulane i Vinje, til å skrive små dikt inspirert av foto med lokale motiv. Av dette lagar Vinje Mållag ein kalender. Fire elevar, to jenter og to gutar frå kvar skule, får diktet sitt i kalenderen. Desse elevane får ei ekstra merksemd som premie. I år var premien ein ostehøvel med Noregs Mållag sin logo, som var festa til ei plate med elevens dikt trykt på. Tanken er at ein ostehøvel kan bli fint å ha med vidare for desse som snart skal på hybel.
Alle som er med i prosjektet får i tillegg ein kalender kvar, og ein tysdag i slutten av august var det tid for å avsløre kven som skulle få premie. På Rauland skule stod jubelen i taket når fyrstemann blei kjent! På alle tre skulane var både lærarar og elevar spente på, og nøgde med, det ferdige resultatet.
Artikkelen held fram under annonsen.
Det er andre året Vinjekalenderen kjem ut, og me i mållaget vonar dette kan halde fram, men utan at norsklærarane i 9. klasse er med på samarbeidet, blir det ikkje kalender. Eit av dei viktigaste måla for prosjektet er å fremje nynorsken for unge, og at dei får erfaring med å nytte nynorsk i ulike samanhengar. Det skal vera eit vakkert produkt, og det blei det i år også, med fotografi frå Thor Christiansen, Frøydis Fossli, Knut Krossbakken, Harald Naper og Ove Inge Årli!
Nokre av årets dikt
Januar
Sola går ned
Månen går opp
Lyser i fred
Ro i min kropp
Guri Geiskelid Fjell, Rauland skule
Februar
Elgen er skogens konge,
Men isen har kanskje meire makt
Snøen har endeleg lagt seg,
Blank og matt
Oskar Tennant, Åmot skule
Mars
Det er sol, det er varmt
Det er vår og snøen smeltar
Veslenup ligg i himmelsynet og ventar
Petter Lindskog, Edland skule
Juli
Det er meg
oppi eit tre
Når eg ser ut igjenom
dett eg ned
Ole Martin Sørland Lyslid, Rauland skule
September
Stille, roleg vatn
Kveldssol her på
Tveitevatn
Malin Vassbotn Apeland, Edland skule
November
Sola skin på dei snokledde fjella
Eg er inne ved peishella
Med ein varm kopp te i handa
Står eg og ser frå min glasveranda
Hellbjørg Versto Nygård, Åmot skule
Kvar månad kan ein gle seg over fine små dikt og flotte foto! I tillegg har Arne Vinje skrive om bygdemålet i Vinje og Rauland, og Frøydis Fossli om fjellgarden Berunuten. Du kan også lesa litt om Vinjesenteret og Vinje kommune.
Kalenderen har også eit økonomisk formål. Det skal gje kjærkomen inntekt til mållaget, men også til klassekassa til dei elevane som vil selje. Elevane får 40 kr for kvar kalender dei sel.
Tekst: Vinje Mållag v/Kari Rustberggård
Foto: Frøydis Fossli og Aaste Haugen
