Vellukka byggjetevling
Skuleungdomen i Seljord deltok førre veke i tevlinga Bibliobattles.
Tevlinga går ut på å byggje ting inspirert frå film, spel og bokverda i dataspelet Minecraft. Tevlinga blir arrangert av Bibliogames, og nesten 1 000 barn og unge deltok, fordelt på 120 bibliotek i heile landet.
– Me hadde over ti deltakarar i alderen seks til elleve år, fortel Line Skori ved biblioteket i Seljord.
Artikkelen held fram under annonsen.
Det var fyrste gong Seljord Bibliotek deltok i tevlinga, men Skori opplyser om at dei ynskjer å vera med til neste år også. Då gjerne med fleire deltakarar.
Fyrstepremien var 1 000 kroner til kvar av deltakarane på vinnarlaget, i tillegg til spelkonsoll og speldag til sitt bibliotek.
– Diverre vann ikkje våre deltakarar, men me var likevel heldige. To av representantane våre var blant dei fem beste i Vestfold og Telemark, fortel Skori.
Tevlinga førte til to trivelege spelkveldar på biblioteket på Granvin. Tysdag møttest deltakarane for å spele Minecraft, sjå på stream av andre spelarar, fargeleggjing og brettspel.
– I tillegg fekk alle spelarane lage sin eigen Minecraft-button som suvernir, opplyser Skori.
Sundag var det duka for direkteoverføring av finalen på storskjerm, samt meir brettspel og fargeleggjing.
Forutan Seljord deltok også Kviteseid folkebibliotek i tevlinga.
