Minnelund i Kviteseid: No blir det høve til å setje ned urne på eit eige felt

Det opplyser kyrkjeverje Kristen Salmelid.

Minnelund er eit område på gravplassen der det ikkje er private gravsteinar, men eit felles stort gravminne. Der blir det felles planting, plass til å setje ned blomar og lys, og benk til å kvile seg på. I Kviteseid blir det namna minnelund og berre for urner. Til kvar urnegrav blir det plass til eit minnesmerke på det felles monumentet. Det er plass til 32 minneplater på kvar av dei to store flatene. På eit lite skilt skal namn på den døde graverast, samen med fødselsdato og dødsdato. Og kan i tillegg ha eit kort minneord eller symbol. Det er altså ikkje ei anonym minnelund, opplyser Salmelid.

Fleire kommunar i Øvre Telemark er i ferd med å etablere slike minnelundar, om dei ikkje alt har det. I bystrok er det mykje meir vanleg, og det har tatt seg godt opp dei siste åra. I byrjinga av 2000-talet vart om lag 30 prosent av dei døde kremert på landsplan. No er det passert 50 prosent. Medan det i tettbygde område av landet er 80-90 prosent kremasjon, har det i Kviteseid dei siste åra vore 3-4 urnenedsettingar, 10-15 prosent av gravleggingane. Unntaket var i 2021 då det blei 30 prosent med heile 8 av 27 gravleggingar, fortel Salmelid.