Danseglade: Kristian Bakkan (t.v.) og Thomas Lundevall kosar seg med å danse og synge på fredagsdisco på Sundvang. Foto: Kari Smeland

Kristian og Thomas lufta dansefoten på fredagsdisco

Ein fredag i månaden er det fredagsdisco for menneske med nedsett funksjonsevne på Sundvang i Kviteseid. Med dans, musikk, glitter og glam blir det ein festkveld for folk frå heile Vest-Telemark og bygdene rundt.

Kristian Bakkan har fått på glitrande gullhatt, kosar seg med ei pølse, og er snar med å synge i mikrofonen.

– Ja, eg likar det, fortel han.

Medan Kristian syng flokkar andre til dansegolvet. Thomas Lundevall frå Kviteseid er ein av dei som likar seg godt på dansegolvet.

– Ja, det er best å danse, ja, smiler Thomas.

Ingar Hovda frå Kviteseid synest også det er koseleg på fredagsdisco.

– Det beste er å danse. Eg likar å synge også, fortel han.

Artikkelen held fram under annonsen.

Det er Kviteseid frivilligsentral som arrangerer fredagsdisco ein fredag i månaden. Dei inviterer folk frå heile Vest-Telemark og bygdene rundt. Akkurat denne fredagen kjem disco-gjengen frå Fyresdal, Nissedal, Drangedal og Kviteseid.

Karoline Jørgensen har tatt turen frå Treungen til Kviteseid for å få vere med på festen. Det er fyrste gong ho deltar på disco på Sundvang, men ho vil gjerne kome igjen.

– Det er moro å kome hit, og koseleg å treffe andre, fortel ho.

Koseleg å treffe andre: Karoline Jørgensen var på sin fyrste fredagsdisco, men det blir neppe den siste. Foto: Kari Smeland

Torhild Strigen frå Kviteseid brukar å kome på fredagsdisco, og likar at det skjer litt.

– Det er bra med litt action, musikk og god stemning, fortel ho.

Nittenåringen fortel at ho likar både å danse og synge.

Artikkelen held fram under annonsen.

Glitter og glam: Torhild Strigen frå Kviteseid likar at det skjer noko, og synest det er god stemning på fredagsdisco. Foto: Kari Smeland

Lett å finne frivillige

Jeanett Torsdalen jobbar på Lundenjordet i Kviteseid. Då ho vart med i styret til frivilligsentralen foreslo ho at dei kunne arrangere fredagsdisco i Kviteseid. Å gjere ein frivillig innsats for dei same folka ho arbeider med til dagleg er ingen problem.

– Dette er ei takknemleg og flott gruppe som ikkje har så mange tilbod. Her kan dei danse, ha det gøy og møte folk frå andre stadar, seier Torsdalen.

– Eg trur dei fleste her har det bra, smiler ho.

God stemning: Cecilie Austjore-Hosum (t.v.) og Jeanett Torsdalen passar på at folk har det fint på disco. Foto: Kari Smeland

Cecilie Austjore-Hosum er dagleg leiar av frivilligsentralen, og fortel at dei har arrangert fredagsdisco sidan april. Denne fredagen er siste gong før sommarferien, men til hausten blir det disco igjen. Ho fortel at det brukar å kome folk frå heile Vest-Telemark, og også frå nokon av kommunane rundt.

– Men Vinje ventar me framleis på, smiler ho.

Sundvang er pynta med ballongar, glitter og glam. Det er også loddsal, og dei har fått fine premiar som berre ventar på å få nye eigarar. I kiosken passar frivillige på at det er varme pølser og kald brus å få.

Artikkelen held fram under annonsen.

– Det har vore lett å finne folk som vil vere frivillige. Me har også eit samarbeid med skulen, med elevane som har valfaget innsats for andre. Dei har vore med ein gong å rigga til og pynta lokalet, så det håpar eg me kan halde fram med til hausten, fortel Austjore-Hosum.