Den mangfaldige pilegrimen

Frå tysdag til torsdag gjekk «Vandre med håp» over Haukelifjell til Røldal. Deltakarane utgjorde ei mangfaldig gruppe med ulik bakgrunn, og dugnadsånda var sterk.

Vêret var ikkje heilt på deira side, men mange var glade for at det verste regnet uteblei. For mange er denne pilegrimsturen årets høgdepunkt, og stemninga var god både på dagtid og på kvelden på den gamle, no nedlagde, Fjellstad turistheim.

Fyrstegongsreisande

Som vanleg var det ei blanding av unge og eldre deltakarar, med ulik fysisk form og mål. Nokre gjekk heile ruta, medan andre tok kortare etappar. Mange deltok for fyrste gong, medan andre er veteranar. Pilegrimsturen vert arrangert av diakon Eilev Erikstein og psykiatrien i Vest-Telemark, og mykje av arbeidet baserer seg på dugnad. Erikstein seier at folk alltid er villige til å hjelpe til.

Ingrid Seltveit frå Skafså var med for fyrste gong i år. Ho har røynsle med turgåing, men var likevel spent på den fyrste etappen, som var om lag 15 km lang. Ho syntest turen gjekk over all forventning og rosar miljøet for å vere ope og inkluderande.

– Alle trur at denne pilegrimen er for folk med psykiske problem, men den er for alle. Her finn ein mosaikk av typar, og røynsler som eg håpar å dra nytte av, fortel Seltveit.

Dugnadens betydning

Ordet «pilegrim» tyder framand, og i dag kan ein pilegrims mål vere kva som helst, ikkje berre religiøst. Erikstein meiner det handlar om å opne seg for nye ting og erfaringar.

– Å vera pilegrim tyder å opne seg for nye ting. Det er ein metafor for korleis livet er og mange av deltakarane opnar seg opp under vandringa. Pilegrimen er mykje improvisasjon undervegs. Alt kan fiksast, ordnast eller løysast undervegs, det er i alle fall mitt motto, fortel Erikstein.

Dugnad tyder å gjere noko saman, og under denne turen var det mange friviljuge som bidrog med mat og støtte. Når nokon opplever noko fint, får dei ofte lyst til å gje noko tilbake, seier Erikstein.

Å ta imot framande

Vaksenopplæringa i Tokke var også med på turen. Lærar Oddvar Hægeland fortel at dei ønskjer å introdusere innvandrarar for norsk turtradisjon og fellesskap.

På turen blei det også eit møte mellom pilegrimar. Kvitsund gymnas har eit prosjekt på skulen der elevane går pilegrimen frå Vest-Telemark til Røldal i løpet av tre år. Tysdagskvelden var regnfull og våt. Det gjekk utover lavvoane til skuleelevane, som fekk oppleve gjestfridomen då dei fekk varme seg og sove i restauranten på Fjellstad.

Plutseleg vart pilegrimar vertskap for andre pilegrimar.