Flyttar renn ut av krinsen, sjølv om det er perfekte forhold i Vest-Telemark

Telemark og Vestfold skikrins flyttar avslutningsrenn til Viken, sjølv om skiforholda er perfekte i Høydalsmo.

Skikrinsen grunngjev flyttinga ut av krinsen med snømangel og lang reiseveg for arrangøren til aktuelle arenaer i Telemark. Lokale langrennseldsjeler frå Vest-Telemark reagerer på avgjerda.

«Grunnet snømangel i Vestfold og lang reisevei for arrangøren til aktuelle arenaer i Telemark, er arrangementet flyttet til Heistadmoen skistadion i Kongsberg», melder Telemark og Vestfold skikrins på Facebook.

Om det ikkje er gode nok forhold i Kongsberg blir rennet avlyst, melder skikrinsen.

Renna som er dei siste i Olympia Sport/Vauhti Pure Cup, blir arrangert neste helg. Botne SK og IL Ivrig er arrangør.

Skieldsjel Mikkel Vadder i Ordal er blant dei som reagerer på meldinga.

– Dette er ei svært uheldig avgjerd når skiforholda er perfekte i Høydalsmo. Når arrangøren grunngjev avgjerda med lang reiseavstand, må ein forstå frustrasjonen og kritikken. Skal me fungere som ein samla krins, må dette aldri skje i framtida, seier Vadder til VTB.

Stein Olav Lie frå Åmdals Verk har også ei rekkje år bak seg som eldsjel i langrennssporten i Vest-Telemark. Han kallar avgjerda flau.

«Dette er flaut – det er svært gode skiforhold i Vest-Telemark. Så mykje for å vera EIN skikrets,» skriv han i ein kommentar på Facebook til nyheita.

Langrennsleiar i skikrinsstyret for Telemark og Vestfold, Erik Christoffersen, grunngjev valet av Viken i staden for Vest-Telemark med økonomi og frivillige, men skjønar at folk i Vest-Telemark reagerer.

– Problemet er at om det skal vera med 50–60 frivillige frå nordre del av Vestfold til eksempelvis Høydalsmo, så blir det sinnssjuke kostnadar. Eg er 100 prosent einig i at me burde halde rennet innanfor krinsen, men det kostar pengar å flytte arrangementsstaben langt, seier Christoffersen, som tippar det ikkje hadde blitt noko renn om arrangørane frå Vestfold hadde lagt det til Høydalsmo.

Han meiner der det heller ikkje bare er å gje eit arrangement til eit anna idrettslag.

– Det kjem an på kvar i krinsen det er lyst til å arrangere, men me kan ikkje legge alle renn på nokre få idrettslag. Nokon arrangørar, mellom anna Høydalsmo, er veldig flinke til å arrangere, seier Christoffersen.

Han fortel at det som regel går fint å arrangere renn i både Telemark og Vestfold, men at vinteren denne gong har gjeve lite snø mange stadar.

– Me kan snart klippe plenane her i Vestfold medan hos dykk bare lavar det ned. Det kan hende me må avlyse krinsmeisterskapen i Stokke 7. mars, men det kan gå. Eg håpar på påfyll av snø, seier langrennsleiaren.

Overnatting, logistikk og økonomi

Rennleiar Espen Liset skulle gjerne arrangert helgas renn i anten Høydalsmo eller Rauland. Likevel meiner han at det ikkje går an å forvente at dei lokale idrettslaga i Vest-Telemark skal overta eit arrangement på kort varsel. Han trur rennet hadde blitt avlyst om Botne SK og IL Ivrig hadde lagt arrangementet til Høydalsmo.

– Det skal riggast i stand til renna også. Dette har med overnatting, logistikk og økonomi å gjera. Eg trur ikkje me kjem til å tene noko nå som me arrangerer i Viken, men det hadde nok enda med underskot om laga frå Vestfold skulle arrangert i Høydalsmo, seier Liset.

Han fortel at Botne og Ivrig måtte korte ned rennet med ein dag fordi det blei ein times tid køyring lenger enn planlagt.

– Eg trur uansett det blir eit bra skirenn, avsluttar han.