Høgaste søkartal til Rauland på fem år
59 personar har søkt om plass ved universitetsavdelinga i Rauland.
Det er det høgaste søkartalet sidan 2014. I fjor var det 41 som søkte seg til Rauland, og i løpet av dei siste fem åra er den totale auken 47 prosent.
– Både bachelorstudiet i folkekunst og bachelorstudiet i folkemusikk aukar samanlikna med i fjor, melder Knut J. Meland, kommunikasjonsrådgjevar ved Universitetet i Søraust-Noreg i ei pressemelding.
Artikkelen held fram under annonsen.
Det nye årsstudiet i Instrumentmaking bidrar også til oppgangen med 12 førsteprioritetssøkarar til dei 10 nyoppretta studieplassane.
Søkartala i Samordna opptak blei offentleggjort i dag. Universitetet i Søraust-Noreg er no Noregs femte mest søkte institusjon innan høgare utdanning. Heile 8626 studiesøkarar konkurrerer om 4236 ledige plassar. I Telemark er det 4121 søkarar til 1932 plassar ved dei fire campusane Bø, Notodden, Porsgrunn og Rauland. Det er litt færre søkarar samla sett enn i fjor. Universitetet forklarar dette med at det berre er opptak til deltidssjukepleie i Porsgrunn annankvart år.