Ingen i årsklassa har hatt større framgang enn Halvor (20) i vinter

Det er ingen førsteårsjuniorar i Norge som har hatt større framgang i vinter i langrennssporet enn Halvor Utistog Kleiv. Skjærtorsdag blei han nummer fire i Knarren Rundt.

Halvor har hatt fleire oppturar i vinter. Den første store kom då han berre blei slått av fire 2003-modellar i noregscuprennet på Nes tidlegare i vinter. Den største kom derimot då det gjaldt som mest i vinter for den unge seniorløparen. Utistog Kleiv gjekk nemleg sitt beste løp då han blei nummer 61 av seniorløparane i NM, 15 i U 23-klassen og nummer seks av dei som er fødd i 2003. Det fortel det meste om unggutens prestasjon.

– Eg er veldig fornøgd med både disponeringa og plasseringa. Eg hadde håp om at eg på ein god dag skulle vere god nok til å bli blant dei 70 beste. Det klarte eg akkurat sjølv om eg tapte nokon plassar mot slutten. Men i dag tapte eg mindre på dei siste kilometerane enn eg har brukt å gjere. Det er forhåpentlegvis ein indikasjon på at eg har blitt meir uthaldande og flinkare på det området, sa Halvor etter det gledeleg løpet på Lillehammer i helga.

Går to minutt fortare

– Kr mykje fortare går du nå enn du gjorde på same tidspunkt i fjor?

– Eg vil tru at eg jamt over år går halvtanna til to minutt fortare nå. Litt avhengig av dagsform, løpsform og så vidare. Det er utruleg inspirerande å sjå at det ikkje er større tidsdifferansar opp til topp-20 og -30-plasseringar. Sjølv om løpstida i dag, på grunn av de tunge forholda, var mykje lengre enn det bruker å vere på ein tikilometer, sa Utistog Kleiv til Vest-Telemark blad etter NM-løpet.

Han hamla opp med, eller var rett bak fleire av dei som er på landslag. Emil Iversen var blant VM-vinnarane som sleit med å halde unna for den dedikerte vinbyggjen. Thomas Westgaard som nyleg blei nummer seks i eit verdscuprenn i USA, klarte så vidt det var å halde Halvor bak seg.

Har fått ein motivasjonsbust

Han var mindre enn eitt minutt unna topp 30-plassering. Utistog Kleiv tenker som så at det kan vere mogleg å kjempe i det sjiktet neste vinter. Dersom han held seg sjukdomsfri, og får gjort den jobben som må ligge i botn for å få utvikling dei neste årene. Halvor føler ikkje at det er realistisk å forbetre seg like mykje som han har gjort det siste året. Men har forhåpningar om å løfte seg så mykje, at han går eitt minutt raskare enn det han har gjort på ein tikilometer.

– Eg er framleis ein god del betre i klassisk enn i skøyting. Men eg har jobba mykje med teknikken for at eg skal bli i stand til å gå fortare også i den stilarten. På sikt har eg lyst til å bli like god i begge deler. Treninga blir lagt opp med tanke på det, sa han som i helga gjekk sin første femmil. Halvor fekk føle på kroppen at det er noko anna å gå fem mil enn ti kilometer.

Kroppen gjekk tom for krefter

Det var derimot god læring å få kjenne på korleis kroppen reagerer når den var tom for krefter. Den unge seniorløparen erfarte at det er vanskeleg å få framdrift i det augneblinken kroppen går tom for krefter og næring.

– Korleis er motivasjonen i forhold til å ta fatt på ein ny sesongoppkøyring?

– Den er veldig god sjølv om det har vore ein rekordlang sesong. Eg skal ha med meg nokon mindre renn før eg setter sluttstrek. Men det blir mindre trening i april enn i dei andre månadene i året. Batteria skal bli lada før eg startar førebuingane til det som blir min andre sesong på seniornivå. Mest sannsynleg vil eg framleis ha base i Vinje, seier Utistog Kleiv.

Skjærtorsdag stilte 20-åringen på start på Fjågesundheia. Han blei nummer fire – 3 minuttar og 27 sekund bak Runar Skaug Mathisen, klubbkameraten som vann rennet.