God deltaking på sesongens fyrste skikarusell
Sundag var det klart for det tradisjonsrike Byrterennet. Her tevla alle aldersgrupper til og med senior. Vest-Telemark skikarusell har renn over heile Vest-Telemark i løpet av sesongen 2022/23 og alle får premie etter løpet.
– Det er viktig med det sosiale rundt renna i karusellen. Godt å treffe jamaldrande som driv med det same som du. Og så er det alltid artig med litt kniving mellom klubbane, seier leiar i skigruppa i Vinje IL, Åse Hylland.
Dei yngste som deltok i rennet var 6 år, og 39 deltok totalt. Det var meldt striregn denne dagen, men regnet heldt seg unna og føret var fint. Vinje IL hadde den største kontingenten med 20 løparar.
Artikkelen held fram under annonsen.
Ulike røynsler
Den snørike vinteren i år har også hatt sitt å seie for rekrutteringa. Vinje IL har merka auka deltaking på treningar og i talet som driv med langrenn.
Samuel Nasser Suleiman var blant dei som deltok i 9-årsklassa.
– Eg går for Vinje IL og har gått på ski sidan eg var tre år. Opplæringa har eg fått av Arnfinn og Heidi Hegg. Eg trenar to gonger i veka og eg synest det gjekk bra i dag, så eg er fornøgd, sa Suleiman etter målgang.
Åtte år gamle Halvor Holte Hylland frå Vinje IL hadde som mål å gjennomføre rennet.
– Det gjekk tungt i dag, men eg klarte å halde eit jamt tempo og er fornøgd med at eg kom meg i mål. Eg vil gå alle renna i karusellen i år, fortalde Hylland etter at han var ferdig.
I Høydalsmo IL har dei også eit godt skimiljø. Klubben hadde åtte deltakarar til start.
Mikkel Nygård Ståland (12) hadde eit klart mål om å vinne si klasse, gutar 12.
– Det er alltid kjekt å slå folk frå Vinje og Åmdal, sa løparen frå Høydalsmo med eit smil før start.
Artikkelen held fram under annonsen.
