Nesten 25 000 til marknadsføring

Eit samrøystes Nissedal formannskap stør Treungenfestivalen AS med 24 688 kroner til marknadsføring. Summen skal brukast til ein heilsides annonse for Nissedal kommune i magasinet til Vest-Telemark blad (VTB) 7. juli i år. Løyvinga blir utbetalt frå det kommunale næringsfondet.

I samband med Treungenfestivalen i starten av august har arrangøren og VTB eit samarbeid om å gje ut magasin. Produktet kjem til alle husstandane i kommunane i Vest-Telemark, Drangedal, Bø, Nome, Sauherad, Åmli, Froland, Vegårshei og Gjerstad. I tillegg vil magasinet bli lagt ut på bensinstasjonar, hotell, turistinformasjonar, campingplassar og andre stader langs Rv41 – Telemarksvegen.

Treungenfestivalen har i år budsjettert med rundt 600 000 kroner til marknadsføring av arrangementet. 50 prosent av kostnaden skal dekkast ved sal av annonsar og sponsorstøtte.