Kommunane overtek tannhelsetenesta
Kommunal- og forvaltningskomiteen på Stortinget føreslår at fylkeskommunane framleis skal ha ansvaret for den vidaregåande opplæringa og kollektivtransporten, men at kommunane overtek tannhelsetenesta.
Komiteen kom med innstillinga si om kommunereforma onsdag. Meir makt og mynde til kommunane er berande element i reforma.
Artikkelen held fram under annonsen.
Fylkesordførar Terje Riis-Johansen er fornøgd med innstillinga.
– Det er bra at komiteen understrekar at det er fylkeskommunen som er best eigna til å drive vidaregåande skule og ha ansvar for kollektivtrafikken i eit fylke, seier han i ei pressemelding.
Regjeringa har vurdert oppgåver som i dag ligg hos fylkeskommunen, fylkesmannen og staten, med tanke på overføring til kommunane.
Ekspertutvalet for kommunereforma vurderte i sluttrapporten i desember at kommunar med minst 100 000 innbyggjarar isolert sett kan vera i stand til å overta vidaregåande opplæring, men fleirtalet i komiteen meiner at ansvaret framleis skal vera på det regionale folkevalde nivået.
Om tannhelsetenesta meiner komitéfleirtalet at kommunane står fritt til å organisere ansvaret anten i eigen regi, i samarbeid med private/ideelle eller i samarbeid med andre kommunar. Fylkesordføraren er ikkje uroa for tannhelsetenesta dersom kommunane tek over.
– Men eg ser ikkje kva som er gevinsten med å gjere det, med ei teneste som er godt ivaretatt i dagens struktur, seier Riis-Johansen.
Fleirtalet i komiteen meiner elles at fylkesmannen i utgangspunkt skal ha ansvar for tilsyn, kontroll og beredskap og nokre rettleiingsoppgåver, men at oppgåver som legg til rett for bruk av politisk skjønn som hovudregel kan vurderast med sikte på overføring til fylkeskommunen. Dei meiner også det bør vurderast å avgrense oppgåvene til fylkesmennene innanfor næringsutvikling og rettleiing av kommunane som samfunnsutviklarar.
Innstillinga går til Stortinget for behandling 9. juni.
Artikkelen held fram under annonsen.
Oppgåvene til eit nytt regionalt folkevalt nivå skal gjennomgåast og framlegg blir lagt fram for Stortinget våren 2016. Etter planen skal proposisjonen om kommunereforma, inkludert det regionale nivået, bli lagt fram for Stortinget våren 2017.
