Vidar har krigshandlingane på nært hald – måtte flykte frå heimbyen

Vidar Norgaard bur i byen Nahariya i Israel, om lag ti kilometer sør frå grensa frå Libanon. Onsdag denne veka flykta han sørover.

– Her er det alarm og inn og ut av tilflutktsrommet dagen lang, fortel Norgaard til VTB.

Seljordingen bur i byen Nahariya ti kilometer frå grensa til Libanon, der stemninga har vore særs spent den siste veka. Begge sidene av grensa er evakuerte, «så lunta brenn», fortel Norgaard. Førre laurdag, 7. oktober, gjekk Hamas til angrep på fleire sivile mål i sør i Israel, og sidan då har det pågått kampar mellom dei to partane. Over 3 400 menneske har mista livet, 1 200 israelerar er ifylgje den israelske avisa Haaretz drepne i Hamas-angrep, medan palestinske helsestyresmakter laurdag føremiddag meldte om 2 215 drepne i Gaza sidan konflikten starta, skriv VG. Ifylgje Haaretz har det vore rakettangrep både på israelsk og libanesisk side den siste veka, mellom Israel og den islamistiske grupperinga Hizbollah i Libanon.

Onsdag denne veka valde Norgaard og kona Yvette å rømme frå Nahariya til dottera, Silje, i byen Holon, 14 mil lengre sør i landet.

– Smell det på grensa til Libanon blir det eit blodbad på begge sider, seier Norgaard til VTB.

Han fortel dei følte Holon var tryggare enn heimbyen, sidan det låg lengre frå grensa. Men dei har framleis vore nær kamphandlingane.

– Også der måtte me flyge inn og ut av tilfluktsrommet dagen lang. Me høyrde stadig smell frå granateksplosjonar ikkje alt for langt unna, fortel Norgaard.

– Stressa på grensa til panikk

Han har sjølv lang bakgrunn frå FN, og har erfaring både frå konfliktar i Midt-Austen og Mellom-Amerika. Det har ikkje familien hans.

– Familien min er stressa – på grensa til panikk. Dette har dei ikkje opplevd før. Då eg jobba i FN blei dei evakuert til andre land då det var krig her nede, og berre eg blei att i Nahariya, forklarar han.

Då VTB snakka med han fredag kveld, hadde han og kona reist tilbake til heimbyen for å hente passa.

– Me tenkte ikkje å ta med oss passa då me rømde onsdag. Difor reiste me tilbake til Naharyia i dag for å hente dei. I tilfelle, fortalde han då.

Dramatisk retur

Laurdag reiste han og partnaren tilbake til Holon og dottera – ikkje utan dramatikk.

– Fem minuttar før me var framme går alarmen. Yvette stoppa bilen midt i vegen og vipps er ho inne i sikkerheitsrommet i næraste bygg, fortel Norgaard til VTB laurdag.

– Eg skrur av tenninga, låser bilen og fylgjer etter, men før eg kjem inn i bygget kjem det tre smell. Dei var ikkje langt unna. Så venta me i ti minutt før me hald fram på ferda, held han fram.

Dei kom vel fram til dottera Silje – no med pass og koffert – og Norgaard fortel til VTB i 16-tida laurdag at alarmen ikkje har gått i Holon på nokre timar.

– Men nett no kjem det nyhende om at to personar er alvorleg skadd i Nahariya etter eit rakettangrep frå Libanon, seier han om heimbyen.

– Her gjeld det å ikkje vera på feil stad til feil tid, legg han til.

Berre ei mogleg løysing

Norgaard fortel at «heile det Israelske folk» er rasande på den politiske og militære leiinga i landet etter terrorangrepet frå Hamas førre helg, der fleire tusen rakettar vart avfyrt av Hamas mot Israel og militante tok seg over grenseovergangar mellom Gaza og Israel. Fleire sivile mål vart råka, mellom anna ein musikkfestival, der 260 menneske vart drepne. Hamas skal også ha tatt eit stort tal Israelske gissel som har blitt ført inn i Gaza.

– Folket forlangar no at tiltak blir gjort for så noko liknande aldri skal kunne skje att, fortel Norgaard.

Han ser berre ei mogleg rute for at situasjonen skal roe seg.

– Eg håpar Hamas snart frigjev dei 130 israelske gislane. Om ikkje blir det eit helvete i Gaza. Hamas har nykelen til løysinga. Gislane. Eller ofrar dei igjen sine sivile for å sverte Israel, seier Norgaard.

I løpet av den siste veka har både USA og Storbritannia kunngjord dei sender krigsskip til Middelhavet for å stø Israel.

– Hizbollah i Libanon tenker seg nok godt om no, med verdas største hangarskip i nabolaget. Skal dei angripe Israel no eller vente, seier Norgaard.