Kvinne bøyer seg over ei babydukke i ein raud stol ved ein marknadsstand.
Magnhild Nesheim har selt heimestrikka dokkeklede i haugar og lass.

Rift om Magnhilds dokkeklede på Vinjedagen

– Eg har selt så mykje at det er mest ingenting att, smiler Magnhild Nesheim.

Åshild Emma Solbjør Journalist
Publisert

Nokre få posar med handstrikka, kunstferdig utforma dokkeklede ligg att på bordet til Magnhild. Snart er det nok fare for at babydokka og barbiedokka må gje frå seg plagga sine, for det er enno to timar att av Vinjedagen.

– Dette er berre ein hobby. Eg gjer det fordi det er moro, smiler Magnhild.

Motedukke i rosa antrekk står på sokkel mellom tekstilar på ein marknadsbod.
Barbie har fått seg Nesheim-drakt.

Litt lenger bort er åmotsdølen Stein Arne Fossheim i same situasjon. Nesten alle dei retro-inspirerte køyretøya av tre og metall har blitt selt.

– Eg har ein full bil bak her av varer som er selt og som skal leverast etterpå, gliser han. Eigentleg skulle han vore i Dølemo i dag, men i går fekk han spørsmål om han ikkje skulle på Vinjedagen.

– Då dreit eg i heile Dølemo, og reiste opp til Vinje. Og salet har vore heilt utruleg, så dette var skikkeleg moro.

Eldre mann med hatt står framfor matbodar på ein utandørs marknad.
Stein Arne Fossheim frå Åmotsdal har selt nesten alle dei retro tre- og metallkøyretøya han hadde.
Mann i hatt står bak ein open veteranbil på ein raud løpar.
Denne kule damptraktoren er ein av tinga han har att då VTB er innom.

Bli med på ein videotur til Vinjedagen.

I enden av marknadsgata står to hestar klare til å bere ungar på tur.

– Det er sikkert livsfarleg. Kva om han bæsjar, kjem det frå to gutar som står og lurar på å prøve seg på hesteryggen.

Tarjei vågar seg etter kvart fram, og smiler stolt når han til slutt sit i salen på den største av hestane.

To barn og ein vaksen står med ein ponni og ein hest ute.
Eira Kaasa Barstad (f.v.), Marianne Moen og Erle Sandok Helle tilbyr rideturar.
Barn sit på ein brun ponni ved ein butikkfasade.
Tarjei Eriksen Åmot på hesteryggen

Litt drama er det også på sportsmatta som er lagt ut eit steinkast nærare Bratlandbui. Der viser Skorve karateklubb kva ein kan lære om ein blir med . Stefan er i gang med ein kata, eit mønster der ein gjer rørsler mot imaginære motstandarar. Men kan me få sjå han mot ein ekte motstandar, tru? Etter litt nøling tek Jennie av seg sokkane for å ta ein kontrollert kamp.

To personar utfører kampsportøving framfor raude brannbilar.
Stefan Jørgensen og Jennie Dokken frå Skorve karateklubb i ein kontrollert kamp.
Person utfører eit høgt sidespark på ei utandørs kampsportmatte.
Stefan Jørgensen og Jennie Dokken frå Skorve karateklubb i ein kontrollert kamp.
To personar øver på kampsport på matter framfor parkerte brannbilar.
Stefan Jørgensen og Jennie Dokken frå Skorve karateklubb i ein kontrollert kamp.
To personar øver på kampsport på matter utanfor ein brannstasjon.
Stefan Jørgensen og Jennie Dokken frå Skorve karateklubb i ein kontrollert kamp.

På veg ut att av sentrum kjem me forbi ein annan som har kontroll på kraftige reiskapar. I Vesaasparken står Oliver Vogt med motorsagene sine og tryllar om ein trestokk til tussen Torvild. Dette er figuren som etter kvart skal vise veg for besøkande langs den planlagde Fløtarvegen.

Person med verneutstyr skjer ut ein stor treskulptur med motorsag utandørs.
Oliver Vogt er fire gonger VM-gullvinnar i speed carving og er på plass på Vinjedagen med motorsagkunsten sin. Her er tussen Torvild i ferd med å ta form – figuren som skal guide folk langs den planlagde Fløtarvegen ved Hyllandsfoss.
Mann i raud jakke held fram to små illustrerte kort mot kamera.
Torleiv Berdal har frimerkestand på Vinjedagen. Desse godbitane er polske.
Stor traktor står utstilt på ein open plass med folk og telt i bakgrunnen.
Traktorar må sjølvsagt prøvast. I denne nusselege doningen sit Hallvard Ringhus Bjåen, Ånund Hylland Olsnes og Gunnar Sandok Ringhus.
Kunde og seljar ved ein utandørs marknadsbod med grønsaker og brød.
Tokke og Vinje hagelag er på plass på Vinjedagen for å verve medlemmar, selje planter og spreie den grøne bodskapen.
Raud veteranbrannbil står på eit torg med folk og andre brannbilar i bakgrunnen.
Det var nok fleire vinjedagsgjester som kunne tenkt seg ein leigetur i denne vogna.
stein arne fossheim kultur nyhende vinjedagen magnhild nesheim vinje
Powered by Labrador CMS