Hallgeir Aarbakk blir dagleg leiar ved Kraftkompetanse KO

Hallgeir Aarbakk er tilsett som dagleg leiar i det nye selskapet Kraftkompetanse KO med kontorstad i Åmot i Vinje.

Det melder Vinje-ordførar Jon Rikard Kleven i ei pressemelding.

Kraftkompetanse KO er eigd av Vestfold og Telemark fylkeskommune og kommunane Hjartdal, Tinn, Seljord, Kviteseid, Nissedal, Fyresdal, Tokke og Vinje. Selskapet skal styrke kraftkompetansen til fylkeskommunen og kommunane.

Aarbakk er 38 år og bur i Seljord. Han har utdanning som sivilingeniør med mastergrad i naturressursforvaltning med mastergradsoppgåve: «Miljøbasert vannføring i regulerte elver.» Aarbakk har arbeidserfaring frå Norges Vassdrags og Energidirektorat der han jobba med vasskraft og vasskraftutbygging – mellom anna med ansvar for konsesjonshandsaming av større vasskraftutbyggingar. Han har også erfaring med å bygge opp selskap frå botn av gjennom etableringa og oppbygginga av Telemark Technologis Fabrication på Notodden og Mercedes-Benz forretning i Seljord.

Aarbakk kjem no frå jobben som dagleg leiar for Mercedes-Benz Funnemark Seljord AS.

– Me er kjempeglade for å ha fått ein motivert og triveleg dagleg leiar som både har relevant utdanning og arbeidserfaring og som i tillegg er gründer med gode erfaring frå å bygge opp selskap, melder Kleven.

Aarbakk startar i jobben 1. april.