Fekk tak i gard etter å ha leita i fleire år

– Eg har leita etter gard i fleire år, og endeleg fann eg ein. Gøy, dette trur eg kan bli veldig bra, seier Holmsve til VTB.

Han har kjøpt den 5902 dekar store eigedomen Bakkane i Heimdal få kilometer utanfor Treungen sentrum. Kjøpesummen blei 5,4 millionar kroner. På garden er det våningshus, driftsbygning, bur, eldhus med smie og skjol, revegard/lager og hytte ved Teilagsvatn. På arealet elles er det 27 dekar dyrka mark, 23 dekar innmarksbeite og 1133 dekar produktiv skog.

Pendling ei tid

– Eg gler meg til å flytte til Heimdal, det blir spennande. Eg kjem dit i slutten av juni for å overta eigedomen, seier Holmsve.

Han ynskjer å ha dyr på garden, men fyrst må det bli gjort nokre investeringar og ombyggingar, fordi det tidlegare bare har vore sauer i fjøset. Planen til Holmsve er å ha ammekyr og vere bonde på deltid. Han har tatt vaksenagronomutdanning seinare tida, så då passar det bra å ha blitt eigar av landbrukseigedom.

Av yrke er han elektroingeniør på Rafsnes, og reknar med pendling ei tid framover etter busetting i Heimdal. Sambuar Linn Nilsen kjem dit etter kvart. Paret bur i dag i hus i Skien.

– Eg må pusse opp litt på huset i Heimdal, og flytter til Bakkane i løpet av sommaren, seier Holmsve, snart ny innbyggar i Nissedal kommune.

Gunnulf Heimdal var den siste som budde på slektsgarden Bakkane. Han gjekk bort i fjor, 97 år gamal. Dottera Signe Hege Heimdal Holmvik og barnebarnet Hildur Marie Heimdal Holmvik bestemte seg for å selje slektsgarden.

Heiteig på 5200 dekar

I saksutgreiinga til formannskapet opplyser landbruksrådgjevar John Olav Lia at ved omsetning av landbrukseigedomar der prisen overstig 3,5 millionar kroner, skal det bli utført priskontroll. Det for å sjå til at omsetning av landbrukseigedomar og den avtalte prisen tilgodeser ei samfunnsmessig forsvarleg prisutvikling.

I prisvurderinga som er med i saksutgreiinga er det rekna på kva for kortsiktige og langsiktige verdiar eigedomen har, og kva som er ein samla realistisk pris for jordbruksareal, skog, utmarksressursar, bygningsmasse og anna.

Les også:

Nå sel ho slektsgarden. – Eg håpar han går til nokon som vil vise han kjærleik

*Verdien av skog og mark er sett til 1,1 millionar kroner, då er det mellom anna rekna med eit ståande haustbart hogsvolum som kan bli avverka i nær framtid.

*Jakt og fiske: Eigedomen er del av Heimdal jaktlag saman med 3 andre eigedomar. Eigedomen har eineeigd heiteig på kring 5 200 dekar, og vil vera eigna for småviltjakt. Her ligg også ei eldre hytte ved Teilagsvatn. Verdi av jakt og fiske vert sett til 700 000 kroner.

*Jordbruksareal: Innmarka har i seinare år vore leigd bort til ein nabo. Arealet er vurdert til å vera lettdrive, og for det totale innmarksarealet vert verdien sett til 200 000 kroner.

*Bygningar: Garden har vore busett inntil nyleg, men har ikkje vore modernisert nemneverdig i seinare tid. Våningshuset er vurdert til å ha brukbar teknisk stand og kan bli modernisert utan store tekniske inngrep. Dei resterande bygningane er i ok stand men har låg bruksverdi utan store oppgraderingar og renoveringar.

Verdi våningshus er 1 500 000 kroner, verdi driftsbygning er 500 000 kroner og verdi andre bygningar er 600 000 kroner.

Priskontrollen er då på totalt 4,6 millionar kroner – 800 000 kroner under kjøpesummen.

Usikre tal

«I vedlagt takst i salsprospektet er det sett eit tillegg for bu-verdi på 950 000 kroner. Dette er eit tillegg som kan bli nytta om takstobjektet ligg i pressområde der våningshuset også bør ha ein eigen tomteverdi. Så vidt ein kjenner til er ikkje Heimdal eit pressområde, til liks med dei aller fleste grender i Øvre Telemark», skriv sakshandsamar Lia.

Han konkluderer  under tvil med å tilrå at kjøpar får konsesjon for erverv av eigedomen. Lia nemner at det er usikre tal knytt til skog og utmark (mellom anna manglande skogbruksplan), noko som kan tale for at kjøpar bør få konsesjon.

«Prisen er noko høgare enn det ein vurderer som fagleg tilrådeleg, men ein ser det likevel som særs positivt at det flytter ein familie til kommunen som ynskjer å drive aktivt landbruk med husdyr,» avsluttar Lia saksutgreiinga si med.