Bøndene får 200 millionar kroner ekstra i investeringsstøtte neste år, fortel landbruksminister Sandra Borch (Sp). Foto: Cornelius Poppe / NTB / NPK

Bøndene får 200 millionar ekstra i investeringsstøtte

Regjeringa aukar investeringsstøtta i jordbruket med 200 millionar kroner neste år.

Dei 200 millionane kjem som ekstra pengar over statsbudsjettet for neste år, og skal rettast særleg mot små og mellomstore bruk.

– Eg er glad for at vi har funne ekstra pengar til dette. Det betyr at endå fleire bønder kan komme i gang med nødvendige investeringar for framtida, og vi legg endå betre til rette for eit levande landbruk i heile landet, seier landbruks- og matminister Sandra Borch (Sp) i ei pressemelding.

Artikkelen held fram under annonsen.

Ho påpeikar at investeringsbehovet i jordbruket er stort. Fleire stader har pengane til investeringar vorte søkte på og delt ut allereie på vårparten, ifølgje landbruksministeren.

Totalt vil investeringsstøtta for neste år vere på 879,5 millionar.

(©NPK)