Vinbyggjane gav mest – som vanleg
Telemark var det sjuande beste fylket i landet med meir enn 7,8 millionar kroner innsamla i TV-aksjonen. Ikkje overraskande toppa Vinje fylkesstatistikken i år igjen.
– Telemark gjorde ein god innsats i årets aksjon og auka resultatet samanlikna med i fjor. Gledeleg å sjå det store engasjementet frå skular, næringsliv, kommunar og vanlege husstandar, seier aksjonsleiar i Telemark, Arild Flatland i ei pressemelding.
Auke på 82 000 kroner i Telemark
Artikkelen held fram under annonsen.
NRKs TV-aksjon gjekk i år til UNICEFs arbeid for å gje utdanning til barn ramma av krig og konflikt i Syria, Colombia, Mali, Sør-Sudan og Pakistan. Det var eit prosjekt som folk tydeleg blei gripne av.
Til saman kom det inn 217,7 millionar kroner til organisasjonen i løpet av aksjonen. Av desse pengane skal meir enn 470 000 barn få moglegheit til skulegang.
I Telemark blei 7 851 534 kroner samla inn. Det er ein auke på 82 000 kroner frå i fjor då TV-aksjonen gjekk til Raudekrossen.
Vinje toppa fylkesstatistikken i år igjen med 408 331 kroner. I Telemark fylgjer Hjartdal og Tinn på plassene bak, så plasserer resten av Vest-Telemark-kommunane seg som perler på ei snor på fylkeslista.
Edland skule best i Vinje
Vinbyggjane gav i gjennomsnitt 109,59 kroner til aksjonen, 38 av dei kom frå bøssene, 37 frå skular og barnehagar, 5 frå næringsliv og 7 frå kommunen.
På landsoversikten er Vinje nummer 14 på lista over alle kommunar fordelt på innbyggjarar. Edland skule var dei som samla inn mest, med heile 56 892 kroner. Åmot skule var like bak med 55 181 kroner.
Samla inn totalt i Vest-Telemark
Artikkelen held fram under annonsen.
(gjennomsnitt per innbyggjar i parantes)
Vinje: 408 331 (109,59)
Seljord: 162 435 (54,53)
Tokke: 138 357 (62,09)
Kviteseid: 131 702 (53,94)
Nissedal: 94 816 (64,24)
Fyresdal: 82 644 (62,66)
Telemark: 7 851 534 (45,30)
