Søkjer ny Seljord-rådmann
I løpet av mars månad vonar Seljord kommune at det som skal den nye rådmannen har søkt på den ledige leiarstillinga. Kommunalsjef Kari Gro Espeland blir på ny konstituert fram til erstattaren etter Per Dehli er på plass.
Ved årsskiftet kom Per Dehli tilbake i stillinga som rådmann i Seljord etter to års permisjon då han var prosessrettleiar for kommunereforma hos fylkesmannen i Telemark. Kari Gro Espeland var konstituert rådmann i Seljord i permisjonstida til Dehli, og gjekk tilbake til kommunalsjefstillinga for helse ved nyttår. Men det skulle ikkje gå lang tid før tilbodet om rådmannsrolla kom på bordet att.
I januar blei det kjent at Dehli takka ja til stillinga som prosjektleiar for å byggje den nye Bø-Sauherad kommune, og 16. januar sa han opp stillinga som rådmann i Seljord kommune. Dehli søkte kommunen om fritak frå å jobbe i oppseiingstida som er på tre månadar, sidan han ynskjer å tiltre i den nye jobben så snart som råd.
Artikkelen held fram under annonsen.
Må gå oppseiingstida
Kommunestyret i Seljord avslo i førre møte søknaden til Dehli om å gå frå stillinga før oppseiingstida er ute, men gav ordføraren mynde til å avgjere eventuell avvikling av ferie i oppseiingstida.
Kommunestyret vedtok også at kommunalsjef Espeland blir konstituert som rådmann i tida etter at Dehli har slutta og fram til ny rådmann tiltrer.
På ynskjelista til Seljord kommune står det at dei ser etter ein strategisk og operativ rådmann som er pådrivar i utviklinga av kommunen, og ein aktiv deltakar i dei sakene som vil bidra til utvikling.
Løyvde 150 000
Etter framlegg frå ordførar i Seljord, Halfdan Haugan, vedtok også eit fleirtal av kommunestyret at administrasjonsutvalet i Seljord skal leige inn ekstern kompetanse for å finne den rette kandidaten som ny Seljord-rådmann. Det blei løyvd inntil 150 000 kroner til arbeidet, og pengane blir henta frå disposisjonsfondet.
Posisjonen støtta ordføraren i dette framlegget, medan sju representantar meinte at administrasjonsutvalet sjølv kunne få vurdere i kor stor grad det var naudsynt å nytte ekstern kompetanse.
