Litt anna handel enn matvarer

Den nedlagte matbutikken i Hauggrend er no fylt opp med fire verksemder og busetting.

Etter mange år med butikk i Hauggrend i Fyresdal måtte drifta leggast ned i fjor. Mange lokale innbyggjarar med aksjar i sjølve butikkbygget er no i ferd med å få tilbake pengane dei satsa for å halde liv i nærbutikken. Bygget er selt til nederlendarane Susan og Edwin Weimer for 320.000 kroner. Paret og dottera Samantha (6) blei fyresdølar for nesten eitt år sidan, og leigde hus på Veum.

Det tidlegare forretningsbygget i Hauggrend må innehalde minst 60 prosent næring. Inntil 40 prosent kan brukast til bustad, og dermed har Weimer fått seg både næringslokale og eigen plass å bu. Arealet der det tidlegare var frisørsalong blir no gjort om til soverom og vaskerom. Mur skal vekk for å gje plass til dører og glas i stoga. Seinare skal det byggast dobbel garasje like ved bygget.

Utbyggingsmodellar

I nordre delen av bygningen er det oppretta ein verkstad som åstad for fleire næringsvegar.

– Me har i gang fire bedrifter. Dette blir veldig moro og spennande, smiler ekteparet om etableringa og satsinga.

Edwin har i mange år hatt lyst til å flytte til Noreg. Finanskrisa gjorde draumen til ein realitet. I Nederland dreiv paret ein modellverkstad som arkitektar nytta seg av før mindre og større eigedomar blei utbygde. Det blei laga mange modellar, og nokre av dei gjekk til andre land. Men så stoppa etterspurnaden.

– Me fekk merke finanskrisa, og det var ein viktig årsak for å flytte til Noreg og satse her, fortel ekteparet, god nøgde med den nye heimstaden sin.

No ynskjer Weimer å få avtaler med arkitektar rundt i Noreg for å fortsette med å lage utbyggingsmodellar ofte basert på teikningar. Når oppdraga kjem, er verkstaden bare ei dør frå der dei nokså ferske fyresdølane no bur.

Oppvarming

Ei anna verksemd dei satsar på, er også eit resultat frå det tidlegare heimlandet. Eit firma i Nederland har sikra seg retten til å selje eit spesielt oppvarmingssystem som blir importert frå USA. Frå Nederland har Weimer fått ei avtale om å ta seg av salet i Skandinavia. Dermed blei Outdoor Boilers of Scandinavia etablert.

– Me har oppvarmingssystem som tilfredsstiller varmebehovet fullt ut i bygg. Det kan også gje varmt vatn, og kan i tillegg brukast til symjebasseng og boblebad, fortel Weimer.

Eit lite bygg med vedomn blir plassert på utsida av bustaden. Vedfyring eller bruk av pellets varmar opp vatn som går i røyr inne i huset. Weimer skal sjølv ha ei slikt varmeopplegg i eige bygg, og har alt selt ei liknande løysing til ein person i Fyresdal.

Internett

Vidare har Edwin eit firma der han tilbyr hjelp til diverse arbeid. Døme er trefelling, rydde skog og gardstun, brøyte snø, vedtransport til hytter og heimkøyring av felte elg for dei som spør om hjelp til det. I tillegg til ein registrert sekshjuling er verkstaden i det nyinnkjøpte bygget god å ha til somme arbeidsoppdrag.

Susan har etablert Regnbogefabrikken der ho importerer mellom anna barneteppe, leiketeppe og store veggbilde til å ha i barnerom. Mykje av salet skal skje ved hjelp av internett, men varene er også å finne i butikkar til dømes i Fyresdal, Kviteseid og Seljord. Dessutan er det varelager i det tidlegare matbutikkbygget i Hauggrend. No skal det handlast med andre varer, det er sikkert og visst.