Kontrollutvalet refsar administrasjonen
I revisjonsrapporten Telemark kommunerevisjon IKS har levert til kommunestyret i Tokke for rekneskapsåret 2008, tek revisorane fleire atterhald.
Haldor Kaasin er leiar i kontrollutvalet i Tokke kommune. Han gav administrasjonen refs ut ifrå atterhald som kommunerevisjonsselskapet skreiv i revisjonsmeldinga.
Kontrollutvalet ser med bekymring at kommunen har fått ein såpass alvorleg revisjonsrapport på bordet. Atterhalda i rapporten er svært alvorlege, og her er det trong for å rydde opp, sa ein bekymra Kaasin.
Artikkelen held fram under annonsen.
Det er fyrst og fremst dårleg organisering og prioritering, og manglande rutinar som blir peika på i atterhalda som seier fylgjande:
* «Det går fram at forskrift om årsrekneskap og årsmelding §3 at driftsrekneskapet og investeringsrekneskapet skal stillast opp på same måte som kommunestyret har vedteke årsbudsjettet på. Det vedtekne budsjettet for 2008 stettar ikkje formkrava i kommuneloven og budsjettføreskrifta. Det er derfor vanskeleg å bekrefte at budsjettkolonnene i rekneskapsoversiktene inneheld korrekt budsjett».
* «Administrasjonen har ikkje oppfylt si plikt ifylgje forskrift om årsrekneskap §10, som seier at det skal vere økonomirapportering til kommunestyret minimum to gonger i året utanom årsrekneskapen».
* «Det er meirforbruk på investeringsprosjekt utan at det er søkt om tilleggsløyving. Kostnader til kulturhus ligg 9,4 millionar over budsjett».
Desse punkta må administrasjonen ta på alvor, og den økonomiske situasjonen Tokke kommune er i no, må det bety aukande fokus på rekneskap og budsjett framover, slo Kaasin fast.
Fleire av politikarane i vårsesjonens siste kommunestyremøte var på talarstolen, og dei aller fleste var bekymra over både revisjonsmeldinga og økonomien i kommunen.
Nye prosjekt blir planlagt i kommunen, trass den økonomiske situasjonen. Budsjettet må granskast nøye, og me kan spørje oss om politikarane let seg presse av administrasjonen, sa varaordførar Astri Fladberg (Frp).
Det er håplaust å styre når me ikkje får tilbakemeldingar undervegs, var den klare meldinga frå Kjell Magne Grave (Ap).
Artikkelen held fram under annonsen.
Revisjonsmeldinga seier noko om den økonomiske stoda i kommunen. Hadde kommunen vore eit aksjeselskap hadde eg fått kalde føter. Er me ikkje varsame framover kan kraftkommunen Tokke hamne på Robek-lista, åtvara Finn Arne Askje (H).
Tokke kommune har per i dag 121 millionar i lånegjeld. Det betyr om lag 51.000 kroner per innbyggjar. For Tokke er dette unormalt og høgt, men på landsbasis er ikkje dette spesielt mykje, slo fungerande rådmann, helse- og sosialsjef og teknisk sjef Olav Bjørn Bakken fast.
Revisjonsmeldinga inneheld også presisjonar om at årsrekneskap og årsmelding ikkje er lagt fram innan fristen i rekneskapsføreskrifta §10, og ho peikar også på at kommunen ikkje har eige finansreglement slik kommunelova § 52 krev.
Nokre av politikarane meinte at nokre av årsakene til manglane i revisjonsmeldinga skuldast alle dei ubesette leiarstillingane i kommunen. Problemet er bare at manglane har vore til stades over lengre tid, i fylgje Haldor Kaasin.
