Gledeleg auke for Telemarkskua
Fyrst når kua har fått kalv og startar å mjølke får bøndene med Telemarkfe tilskotet for bevaringsverdige storferasar. Det hindrar rekruttering og gjer det vanskelegare å motarbeide innavl, meiner Landslaget for Telemarkfe.
Landslaget for Telemarkfe har gjennom prosjektet «Krafttak for å redde verdas vakreste ku» fått midlar til mellom anna avlsplanlegging, marknadsføring og betre synliggjering av rasen gjennom snart tre år.
Ved årsskiftet skal prosjektet vere ferdigstilt, og styret inviterte denne helga til seminar for å summere innspel og avdekke ulike behov for tiltak rundt å redde verdas vakreste ku.
Artikkelen held fram under annonsen.
20 entusiaster var samla på Morgedal hotell laurdag for å diskutere framtida for Telemarkfeet.
– Arbeidet er svært viktig for Telelmarkfeets framtid og me er godt fornøgd med utbytte av helgas seminar, fastslår Sigbjørn Haslemo, leiar for Landslaget for Telemarkfe i ei pressemelding.
Utfordring med rekruttering
Eit av tema som blei diskutert var tilskotet for bevaringsverdige storferasar, som per nå er på 3 460 kroner per mordyr. Tilskotet har auka med 460 kroner sidan jordbruksforhandlingane i 2017.
– Det er positivt at tilskotet har auka, men utfordringa vår er at det ikkje er avlsdyr å få tak i. Eg har bygd til 60 kuer og unnar ingen den perioden etter at fjøset stod nybygd. Eg hadde stort behov for rekruttering, men det var knapt dyr å få kjøpt, fortel Aslak Snarteland, mjølkeprodusent frå Fyresdal.
– Hadde me fått tilskot også på oppdrett tror eg det ville hjelpt ein del på situasjonen. Det er noko styret ynsker å jobbe videre med, seier Haslemo.
Auka fokus på rett avl
NIBIO-statistikk viser positive utviklingstrekk for storferasen, der dei ferskaste tala frå 2018 viste 387 avlskyr og 114 besetningar med Telemarkfe.
– Det er noko usikkerheit rundt tala, men det me kan slå fast er at me ser ei gledeleg auke. Gjennom statistikkprogrammet EVA har me fått høve til å sjå slektskap mellom avlsdyra, og me får difor betre kontroll over hastigheita på innavlsauka. Det vil vere viktig for at populasjonen skal vere bærekraftig, fastslår Lina Aasan, leiar for avlsutvalet.
tone.tveit@vtb.no
