Bilethoggarar stiller ut saman
To kunstnarar frå Vest-Telemark, Philipp Dommen og Gunnar Torvund, stiller ut skulpturar i Kunsthall Grenland i Porsgrunn.
– Båe kunstnarane høyrer til ein generasjon bilethoggarar som i 1970-åra søkte mot ei tydeleg materialorientering i det kunstnariske uttrykket, noko dei har til felles med sentrale norske bilethoggarar som Kristian Blystad og Bård Breivik, orienterer utstillingsarrangøren.
Regional samtidskunst
Kunsthall Grenland er organisert som ei stifting og har fem tilsette. Lokalet ligg i Storgata i Porsgrunn. Av heimesida deira går det fram at kunsthallen har ein regional status, og ynskjer å engasjere publikum gjennom produksjon og formidling av samtidskunst.
Artikkelen held fram under annonsen.
Til den fyrste utstillinga i år har altså galleriet invitert Dommen og Torvund til å stille ut saman. Utstillinga har fått tittelen «Uventa ting skjer».
– Det indikerer at arbeida som publikum møter har noko uventa og overraskande ved seg, lokkar utstillaren, som fortel at Torvund nyttar ulike materialar, og at referansar både religiøse og kultur- og kunsthistoriske element pregar arbeida hans.
Ulike materialar
I dei monumentale utsmykkingane Dommen har gjort, har han ofte nytta kombinasjonen av kalkstein og akrylglas. I denne utstillinga tek han i bruk ei breiare spekter av ulike materialar.
– Mekanisk rørsle går att i arbeida og opnar for eit tolkingsrom i spennet mellom det underfundige og eit mogeleg større tematisk alvor, lyer omtalen som skal vekke interessa for ei uventa kunstoppleving.
Utstillinga opnar laurdag med ei kunstnarsamtale, og blir ståande i sju veker.
Philipp Dommen
* Fødd i 1952 i Luzern i Sveits, busett i Svartdal.
* Gjekk i lære som steinbilethoggar i Irland på 1970-talet og i ein litografiverkstad i Paris i 1980.
* Gjekk på Statens Kunstakademi 1983–1984.
Artikkelen held fram under annonsen.
* Debuterte med den fyrste utstillinga si i Noreg på Henie Onstad kunstsenter i 1988.
* Elles har han hatt separatutstillingar i Trondheim, Torshavn på Færøyane, Kristiansand og i Sursee i Sveits.
* Har hatt mange utsmykkingsoppdrag, mellom anna på Ullevål universitetssjukehus og på sjukehusa i Skien, Kragerø, Porsgrunn og Notodden.
* Er innkjøpt av Stadt Luzern i Sveits, Telemark fylkeskommune, Norsk kulturråd og Stadt Sursee i Sveits.
(Kjelde: philippdommen.com)
Gunnar Torvund
* Fødd i 1948 i Nærbø på Jæren, busett i Kviteseid.
* Kom inn på kunstakademiet i København som 20-åring.
Artikkelen held fram under annonsen.
* I åra 1970–72 hospiterte han ved Statens Kunstakademi i Oslo.
* Blei kjent for eit større publikum i 1970 då han deltok på Haustutsillinga.
* Har hatt ei rekkje separatutstillingar; mellom anna i Stavanger, Berlin, Oslo, Bergen, Tromsø, Hå gamle prestegard, New York, Stockholm, Gøteborg og Arendal.
* Er representert i: Museet for samtidskunst, Nasjonalgalleriet, Stenersensamlinga, Rogaland kunstmuseum, Sørlandet kunstmuseum, Bergen billedgalleri, Gøteborg konstmuseum, Malmø museum og Oslo kommunes kunstsamlingar.
(Kjelder: snl.no og galleridobloug.no)
