Musikken som lever evig

I ei musikalsk tidsreise kom Wood-stock til Tokke. Musikken er like god i dag som den var den gongen, meiner Sissel Timland.

Tokke kulturhus stelte i stand Woodstock-konsert med 68er og flower power som tema.

Musikken sto Akkerhaugen Rocksamfunn (ARS) for. Dei mønstra eit imponerande ensemble på elleve musikarar, som leverte ikoniske låtar frå 60- og 70-talet.

Sissel Brendstuen Timland og Ståle Brendstuen hadde teke på seg 60-tals gevantar og såg fram til ein tur tilbake til ungdomstida.

– Dette er veldig gjenkjennleg, fordi det var musikken me vaks opp med. Eg var 14 år i 68, og hadde akkurat begynna å gå på dans. Ein blir nostalgisk og tenkjer attende til ei fantastisk ungdomstid, seier Sissel.

– Eg har ein son på 35 år som også likar denne musikken. Den er lett å bli glad i, held ho fram

Ståle rosar tiltaket, og meiner slikt bør det vere meir av.

– Det er eit arrangement for godt vaksne, og ein fin måte å få oss ut på, seier han.

I høve temaet var det også slik at om ein kunne stille med eit bilete av seg sjølv frå 1969, så fekk ein 50 kroner i rabatt på inngangsbilletten.

Det var eit tilbod som Tjøstov Djuve ikkje lèt gå frå seg.

– Dette er teke heime i Lårdal, det siste året eg gjekk på ungdomsskulen før eg reiste på gymnaset i Bø, seier Djuve.

– Det var mykje som hende på den tida. Vietnamkrigen og månelanding, held han fram.

– Det er sikkert fordi han er kommunekasserar at han ville sikre seg rabatt, kjem det frå Nora Vinjerui.

– Det var i alle fall den beste musikken på den tida, er dei båe skjønt einige om.

Noko nytt

Ingvild Lilletvedt og Benedikte Nes er arrangørane som ville markere brytningstida 68/69.

– Det er 50 år sidan studentopprøret og snart også jubileum for Woodstock, og me tenkte det var ein artig epoke å markere med ein konsert.

Det var nokon som hadde høyrd Akkerhaugen Rocksamfunn sin Woodstock-konsert på Telemarkfestivalen, og var veldig nøgd med den. Folk vil i dag også ha noko meir enn musikk. Difor la me opp temaet rundt dette, seier Nes.

Lilletvedt seier kulturhuset prøver seg fram med ulike tilbod.

– Målet er att me skal femne breitt og ha noko for alle aldrar, seier ho.

Elleve på scena

Camilla Moen i ARS seier musikarane spelar i ulike band, og at dette var ein eingongsgreie dei hadde under Telemarkfestivalen.

– Men så vart me invitert hit, og me er jo alle glade i den musikken, seier ho.

Ottar Langåsdalen spelar keyboard, og meiner musikken frå Woodstock er tidlaus.

– Det var ikkje akkurat vanskeleg å finne låtar når me sette i hop spelelista, seier han.

olav@vtb.no