Utbetrar strekning på E134. – Det blir nok lysregulert i ei lang beite framover
Måndag denne veka begynte den største jobben i prosjektet, omlegging av ein sving ved Huka. I løpet av sommarhalvåret skal fem kilometer ny europaveg vera ferdig.
Det fortel byggjeleiar i Statens vegvesen, Dag Rune Kvålen, til VTB.
Det har i ein lengre periode vore lysregulert på strekninga, og Kvålen fortel at trafikantane i månadane som kjem også må forhalde seg til dette.
Artikkelen held fram under annonsen.
– Det blir nok lysregulert i ei lang beite framover, i alle fall fram til sommarferien, seier han.
Arbeidet består i hovudsak av å gjera vegen breiare og betre siktsonene. Utbetringane vil i stor grad skje gjennom opprusting og rydding av den eksisterande traseen, med eitt unntak:
– Det er ein sving ved Huka som skal leggjast om. Dette arbeidet starta måndag denne veka, fortel Kvålen.
– Me håpar å koma i gang med asfaltering før ferien, og gjere oss ferdige på seinsommaren, held han fram.
Heile strekninga
I tillegg til dei fem kilometrane som skal vera ferdige til sommaren, har ei strekning på mellom tre og fire kilometer blitt utbetra ut frå Åmot. I fjor sto også ein dryg kilometer mellom Breiland og Høydalsmo ferdig.
– Målet er at strekninga mellom Åmot og Høydalsmo skal ha like god standard som mellom Høydalsmo og Morgedal, seier Kvålen.
Men når dei resterande kilometrane over Grønliheia blir rusta opp, er for tidleg å seie noko om.
– Det kjem an på budsjett, men så fort me får løyvingar er me klare til å setje i gang att, seier Kvålen
