Nå har barnehagen blitt endå billigare: – Det løner seg å bu i distriktet

– Det var jo billig med 1500 kroner, og nå har det blitt endå billigare!

Siri Dubrefjord Moen og mannen Sondre Moen er to av mange foreldre som no kan smile heile vegen til barnehagen - og banken. Frå 1. august har regjeringa redusert maksprisen for ein barnehageplass frå 1500 kroner til 700 kroner i månaden for dei som bur i sentralitetssone 5 og 6 (distriktskommunar). 

Stor effekt

Hedda og Torjus Dubrefjord Moen går i Tussejuv barnehage i Seljord. Bror Torgrim skal starte på skulen i haust, men Siri og Sondre har hatt tre ungar i barnehage over fleire år. 

– At det no blir endå billigare er veldig bra. Det har hatt stor effekt på familieøkonomien at det gjekk ned frå 3000 kroner til 1500 kroner i månaden i fjor. Og nå blir det halvparten av det att, seier Siri.

Ho fortel at slekta på Notodden, der ho er frå, har betalt 2000 kroner i månaden for ein barnehageplass det siste året, medan dei i Seljord har betalt 1200 kroner. 

– Det lønner seg absolutt å bu i distriktet. Her er det i tillegg fråtrekk på studielån på 25 000 kroner i året. Eg sparar ganske mykje i året i forhold til brørne mine på Notodden.

Gode grunnar

– Eg tenker at dette er eit kjempeviktig tiltak for barnefamiliar.

Før den første reduksjonen i makspris kom, kosta ein barnehageplass 3000 kroner i månaden. Då bruka familien Dubrefjord Moen 60 000 kroner i året på barnehage, med søskenrabatt.

– Eg trur ikkje så mange har fått med seg at det nå berre kostar 700 kroner per barn, seier Siri.

Ho meiner redusert makspris i barnehagar og fråtrekk på studielån kan vere gode grunnar til å flytte til distriktskommunar som Seljord.

Kva tenker du om at ei ny regjering kan endre barnehageprisane att?

– Eg bekymrer meg litt for det. Alle barn har godt av å gå i barnehage. Eg håper prisane held seg.