Vil førebyggje ulykker med kunnskap og gode haldningar
Tryggleik på vatnet var tema då representantar frå politiet, brannvesenet, Røde Kors og Kviteseid kommune inviterte ungdom frå Kviteseid og Høydalsmo til ein skuledag ute.
– Dette er veldig relevant. Eg er mykje på fjorden om sommaren, seier Vemund Aamot. Han går i 9. klasse på Kviteseid skule og synest det er fint med ein dag der dei kjem seg ut av klasserommet for å lære om tryggleik på vatnet.
Det var ordførar Bjørn Nordskog som i 2019 tok initiativ til å arrangere ein dag der fleire instansar deltek for å førebyggje ulykker.
Artikkelen held fram under annonsen.
– Men me skal ikkje ta frå ungdommen gleda med å vere på vatnet, seier han.
I år var ungdom frå skulane i Kviteseid og Høydalsmo invitert.
Vil gjere ungdommen i stand til å ta gode val
Politistasjonssjef i Midt- og Vest-Telemark, Sigrid Dahl, har vore pådrivar for ein handlingsplan der visjonen er null skadde og drepne i trafikken i Vest-Telemark. Vest-Telemarkrådet har koordinert arbeidet med handlingsplanen, som har fokus på å skape gode haldningar både for dei som ferdast på veg og vatn. Den førebyggjande dagen i Kviteseid er eit av tiltaka som er nemnt i nullvisjonsplanen.
– Me ynskjer jo at ungdommen skal vere aktive og ute, men det må skje så trygt som mogleg. Og det er ungdommen sjølv som er dei viktigaste tryggleiksskaparane, seier ho.
Som eit ledd i å førebyggje ulykker på vatnet meiner ho det er viktig å gje ungdommen kunnskap som gjer dei i stand til å ta gode val.
Kan påverke for framtida
Christian Grüner frå politiet i Midt- og Vest-Telemark meiner det er ein del promillekøyring på vatna, også i Vest-Telemark.
– Me tek nokon kvart år på kontrollar på innlandsvatna i Øvre-Telemark, seier han.
Grüner håpar at politiet på denne dagen kan vere med på å bevisstgjere ungdommane.
Artikkelen held fram under annonsen.
Ungdomsskuleelevane VTB snakkar med trur ikkje det er ruskøyring blant ungdommane i Kviteseid.
– Men det er kanskje meir blant dei som er eldre, seier dei.
– Me er neste generasjon. Når me får gode råd nå kan me vere med på å påverke for framtida, seier Vemund Aamot.
