Slik blir trafikk-sommaren på Haukelifjell
Tunnelarbeida på E134 Haukelifjell startar opp igjen onsdag 15. juni og held på fram til hausten 2022.
Det melder Statens vegvesen i ei pressemelding.
Rehabiliteringen av Vågslid- og Haukeli-tunnelane har pågått i sommarsesongane 2020 og 2021 og held fram i år. Det har vore mindre arbeid i tunnelane i heile vinter, men frå onsdag 15. juni av blir det fullt arbeid i tunnelane og Svandalsflona rasoverbygg til arbeida blir avslutta hausten 2022.
Artikkelen held fram under annonsen.
Til liks med fjoråret blir det i hele perioden kolonnekøyring heile døgnet for lettbilar på omkøyringsvegane over Dyrskar og Vågsli.
For tungbilar blir det frå kl. 10.00 til 23.00 kolonnekøyring gjennom Vågslidtunnelen og kolonnekøyring over Dyrskar. Fjellovergangen blir stengt for tungbilar frå 23.00 til 10.00 dagen etter.
I 2020 og 2021 auka sommartrafikken på det meste med ti prosent frå året før. Dette førte til nokre utfordringar for avvikling av trafikken.
– I år håpar me å unngå dette, melder Statens vegvesen i pressemeldinga.
Vegvesenets råd
– Planlegg turen og reis tidleg på dagen. Trafikken hopar seg erfaringsmessig opp frå 12-tida og ut over dagen.
– Ta med ekstra drikke og niste.
– Følg rettleiinga frå trafikkdirigentane.
– Ver tolmodig, ta deg god tid.
– Køyr forsiktig og hald avstand.
