Skogbrannfare i Sør-Noreg: Ekstra helikopterberedskap blir forlengd
To ekstra skogbrannhelikopter blir haldne i beredskap på Kjeller i Viken og på Kjevik i Agder. Det er sendt ut gult farevarsel for Austlandet og deler av Agder.
– DSB har gjort ei vurdering og ønskjer ekstra beredskap med to helikopter, det eine frå og med 21.07. til og med 23.07 på Kjevik og det andre frå 21.07 til og med 25.07 på Kjeller. Dette er då i tillegg til det faste på Torp, opplyser skogbrannhelikoptertenesta på Twitter.
Skogbrannhelikopteret til staten er i beredskap frå 15. april til 15. august. Bruken blir koordinert av Hovudredningssentralen for Sør-Noreg (HRS).
Artikkelen held fram under annonsen.
To gonger i veka vurderer DSB skogbrannfaren og kva helikopterberedskap som trengst.
– Det blir gjort løpande vurderingar gjennom heile sommaren, og det er ikkje uvanleg at ein har eitt eller to helikopter i beredskap i tillegg til det som står på Torp, seier presseansvarleg Morten Harangen i DSB til NTB.
Det er sendt ut gult farevarsel (moderat fare) for skogbrann på Austlandet og austlege delar av Agder. Faren varer til det kjem tilstrekkeleg med nedbør.
- Vegetasjon kan lett ta fyr og store område kan bli ramma, heiter det i varselet.
(©NPK)
