Rolf (17) frå Kilegrend blei noregsmeister i boksing
Rolf Valle Vik, opphavleg frå Kilegrend i Fyresdal, blei i helga juniornoregsmeister i boksing.
17-åringen tok sølv i fjor. Då var det ungdoms-NM. Som fyrsteårsjunior var han i helga yngst i klassa. Han boksa mot 17-, 18- og 19-åringar i 75 kilosklassa.
– Eg hadde store forventningar i fjor, men mindre i år sidan eg visste eg konkurrerte mot dei som er eldre enn meg. Det gjorde kanskje at eg hadde litt lågare skuldrer, seier den ferske noregsmeisteren.
Artikkelen held fram under annonsen.
– Det var ein tett meisterskap, men eg følte eg hadde kontroll i alle kampane, legg han til.
I finalen vann han 5-0 mot Tage Lund Ingvaldsen frå Raufoss bokseklubb.
Valle Vik voks opp i Fyresdal. Her budde han fram til 2. klasse. Han er rett som det er heim til faren som bur i Kilegrend.
Det var fyrst då han flytta til Arendal i 2019 at han byrja med boksing.
– Eg måtte finne ein sport. Etter å ha vore på ei trening, så blei eg hekta, seier Valle Vik.
Han går for tida på toppidrettslina på Sam Eyde videregåande skole i Arendal og trenar to gonger om dagen – både styrke og kondisjon, og boksing. Valle Vik representerer Grimstad bokseklubb.
– Boksing er veldig variert. Ein må vera i god form – både når det gjeld styrke og kondisjon, i tillegg til å ha god teknikk. Eg synest det er veldig gøy og gler meg til kvar dag med trening, seier han.
17-åringen er ein del av juniorlandslagsmiljøet og har ambisjonar om både nordisk meisterskap og europameisterskap – men den store målet er OL.
Artikkelen held fram under annonsen.
Kanskje alt om fire år.
Men fyrst skal han til Danmark med landslaget for å konkurrere i turneringa «tuff nuff».
– Det er ei turnering der ein får to kampar uansett mot internasjonal motstand, sa boksetalentet til lokalavisa Agderposten etter NM i Kristiansand i helga.