Løpet langs Nisser vart suksess. – Håpar løpet kan inspirere til å bruke den vakre naturen vår til mosjon og helsekjelde
Laurdag arrangerte Treungen Idrettslag terrengløpet «Telemarks vakraste». Over førti personar i alle aldrar gjennomførte løpet langs Nisser.
– Moro at over halvparten av deltakarane i år var lokale, og at det var ein del unge med, fortel ein av arrangørane, Herdis Gautefald.
43 personar i alle aldrar deltok, og det var alt frå mosjonistar til drivne idrettsfolk som stilte til start. Løparane kunne velje mellom fem og ti kilometer.
Artikkelen held fram under annonsen.
Initiativtakarane, som også er fysioterapeutar, fortel at dei håpar arrangementet kan inspirere til å bruke den vakre naturen til mosjon og helsekjelde.
– Eitt av ønska med «Telemarks vakraste» er å løfte fram den vakre Nisserstien langs innsjøen Nisser, og inspirere til aktivitet ute i det fri. Det er også moro at det skjer noko og blir litt liv i sentrum i den vakre hagen bak Turine sommarbutikk, fortel Gautefald.
Bilete 1 av 10
Oppvarming: Primus Motor Herdis Gautefald hadde felles oppvarming før løpet.Bilete 2 av 10
I Turines hage: 43 personar deltok i terrengløpet på laurdag. Start og mål var i Turines hage i Tveitsund.Bilete 3 av 10
Gode kollegaer: Birgitte Brekke (t.v.) har deltatt i Telemarks vakraste før. – Men eg har aldri sprunge eit løp i heile mitt liv, sa Gerd Irene Sønderland før start. Dei to kollegaene heldt fylgje heile løpet.Bilete 4 av 10
Ikkje frivillig: Martin Legaspi og Anna Fintland stilte til start. – Eg hadde ikkje noko val, seier Martin. – Pappa tvang oss til å bli med, seier Anna.Bilete 5 av 10
Tidtakarar: Rune Johansen og Paul Willy Setane sørgde for at deltakarane fekk rett tid.Bilete 6 av 10
Speaker: –Eg er nok flinkare til å prate enn til å springe, sa Per Arild Brekke som var speaker under arrangementet.Bilete 7 av 10
Kjappast: Torbjørn Brodtkorb Danielssen og dottera Emmeli Vatne Danielsen (15) kom fyrst i mål og vann dermed fem kilometersklassa på tida 27.40.Bilete 8 av 10
Superrask: Isak Berggren (12) gjorde eit veldig godt løp og var godt fornøgd med å komme i mål før mamma.Bilete 9 av 10
Idrettslagsleiaren: Roy Åge Homme er leiar i Treungen idrettslag og stilte til start på Telemarks vakraste der han sprang fem kilometer.Bilete 10 av 10
Raude Kors: Ein av løparane fekk plaster på eit lite skrubbsår, elles var det ingen skader, melder det lokale hjelpekorpset. f.v. Jonas Holskar, Håkan Adriano Matre, Vibeke Holskar og Ali Hannan.Ho melder at arrangementet gjekk knirkefritt og at ein god dugnadsgjeng frå idrettslaget sørgde for dette. Det vart sjølvsagt også delt ut premiar, NM-pokal, altså Nissedalsmeister, til beste tid på både fem og ti kilometer for både kvinne og mann.
– Det vart veldig gode tider i år! 27.40 på fem kilometer og 45.47 på ti. Gratulerer til vinnarane, melder Gautefald.
Etter løpet arrangerte ungdomslaget Vårsol konsert på Solborg med lokale Rune Sanden med band.
