Kristian (15) må snart ta eit vanskeleg val: – Det blir vanskelegare å kombinere dei to idrettane

Kristian Broshaug Haakenstad har i løpet av kort tid fått med seg både Hovudlandsrennet i langrenn og skiskyting. Han har føresetnader for å bli god i begge idrettane, men i løpet av eitt års tid må han ta eit val.

– Det blir vanskelegare å kombinere dei to idrettane når eg er ferdig med det siste året på ungdomsskolen. For eg har lyst til å begynne på skigymnas. Det inneber at eg må velje ei langrenn- eller skiskyttarlinje. Det kan bli Hovden dersom eg går for langrenn. Dersom eg vel skiskyting, så ser eg på Sirdal som mest aktuelt. Eg har høyrt at det skal vere eit bra opplegg både der og på Hovden, seier Broshaug Haakenstad som går i niande klasse på Gimle skule i Fyresdal.

Han og familien flytta frå Bø til Fyresdal for tre år sidan. Det fall seg då heilt naturleg for Kristian at han testa ut skiskyting. Bygda har i fleire tiår hatt eit av dei beste skiskyttarmiljøa i Telemark, og det tok ikkje lang tid før innflyttaren var ein del av det. Den unge tenåringen ville ikkje heilt gje slepp på langrennssporten. Han fortsette derfor med å gå vanleg langrenn for Skarphedin, som var klubben han representerte då flyttelasset blei sendt.

Mange konkurrentar

Dei aller fleste skiskyttarrekruttane i Fyresdal nøyer seg med skiskyting. Men det er ein og annan som stiller til start i langrenn når det passar seg slik. Kristian Broshaug Haakenstad bruker dei aller fleste helgene i vinterhalvåret på enten langrenn eller skiskyting. Hovudlandsrennet på Gålå blei tidleg blinka ut då terminlista var klar. 14-åringen og tre utøvarar frå Rein og Edland, var aleine frå Vest-Telemark i massemønstringa.

Kristian klarte seg bra i det som var hans aller første møte med dei beste 2009-modellane i landet. Det var mange av dei som hadde tatt turen til Gålå og Midt-Gudbransdal. I hans klasse var det nesten 250 deltakarar, og det er ein indikasjon på at det framleis er veldig god rekruttering i Noreg

Hevda seg trass fall

Kristian hadde ikkje noko spesielt mål då han sette kursen for Vinstra-traktene. Men håpa det, på ein god dag, skulle vere mogleg å kjempe om premie. Det klarte fyresdølen med god margin i den såkalla langrenncrossen. Der blei det ein flott 46. plass. Det trass i at Broshaugen Haakenstad hadde eit fall som kosta han mange sekund og plasseringar. Det hadde blitt ei betydeleg plassering dersom han hadde halde seg på beina.

– Kor mykje trening ligg det bak dei flotte prestasjonane dine, Kristian?

– Eg prøver å få med meg dei fleste fellestreningane til Fyresdal skiskyttarlag. Eg trenar også ein god del på eiga hand. Treninga gir resultat, og eg føler at eg har hatt fin framgang i vinter. Det har gått greitt i dei fleste renna, seier han som sjonglerer litt mellom langrenn og skiskyting. Kristian synest skiskyting er moro sjølv om han ikkje har halde på like lenge med den idretten.

Framleis fine treningsforhold

Det er framleis fine treningsforhold i lysløypa og elles Fyresdal, sjølv om det er merkbart mykje mindre snø enn det var før i vinter. Kristian håpar å få med seg nokre renn til før han han stt vekk konkurranseskia og etter kvart startar førebuingane til ein ny sesong.