Herman tok sølv i lengde i UM

Med eit hopp på 6,25 kunne Herman Hogstad Sveinsson frå Seljord juble for ei overraskande sølvmedalje i Ungdomsmeisterskapen (UM) i Bærum laurdag.

Hoppet var også ei monaleg forbetring av den personlege rekorden. Sveinsson har tidlegare hoppa 6,02 innandørs.

Aiden Vincent frå Groruddalen Friidrett vann med eit hopp på 6,38. Favoritten William Kolberg måtte nøye seg med bronse.

På 60-meteren blei seljordingen slått ut i semifinalen. Han blei totalt nummer 12 av 45 deltakarar. Sveinsson vann forsøksheatet sitt. Han sprang på 7,51 i forsøket og 7,53 i semifinalen.

16-åringen frå Seljord hadde mål om finaleplass, men han fekk ein dårleg start i semifinalen og det blei for mykje å ta inn på ein så kort distanse.