Herman (19) blei heidra på krinstinget

Friidrettstalentet Herman Hogstad Sveinsson (19) frå Seljord fekk to av prisane som blei delt ut på krinstinget i Telemark friidrettskrins i Skien førre veke.

Fyrst fekk han «Friidrettens venners kretspris» som blir tildelt jente og gut (18 år) med det beste resultatet i krinsen gjennom sesongen. Sveinsson fekk prisen for resultatet 11.07 på 100 meter. Det oppnådde han i Grorudleikane i mai.

Vidare mottok han Syverstads minnepremie i sprint for det beste resultatet blant herrane i 2022-sesongen. Også her var det 11.07-løpet som var utslagsgjevande.

Motstandsmannen Gunnar Syverstad er mest kjend for sin innsats under 2. verdskrig som aktiv motstandsmann som vart skoten av tyskarane like før freden i 1945, men han var også i si tid Telemarks raskaste sprintar. Minnepremien hans vert delt ut kvart år på tinget.

– Utan tvil motiverande for vidare satsing, seier Herman Hogstad Sveinsson om prisane.

Om ein ser på krinsstatistikken så kan ein lese at Sveinsson har åttande beste tid gjennom alle tider i Telemark på 200 meter med tida 22.33 (sett på UM i fjor).

Herman ser nå fram mot utandørssesongen 2023 og er for tida i god trening. Det har blitt mange treningskveldar på Eventyrøy, i tillegg til Skienstur kvar veke. Treningsforholda har vore alt anna enn gode i vinter med mykje snø, vekslande vêr og is på Eventyrøy. Slik sett har ikkje treninga blitt optimal tidlegare i vinter.

Nå er forholda betre, og det ligg an til mykje god trening fram mot sesongen som startar i midten av mai.

Sesongen 2023 blir hektisk i perioden frå juni til starten av september, med senior-NM, junior-NM, UM og VU-spelen i Gøteborg som dei største konkurransane. Over ein periode på berre 2–3 månadar blir det konkurransar på Lillehammer, Bærum, Bislett, Sandnes, Bergen, Jessheim, Skien, Porsgrunn og Rjukan for 19-åringen som også er russ i vår.