Leverte: Lone Isabell Berget og Sherdil tok ein samanlagt andreplass i landsmeisterskapen i Drammen i helga. Foto: Privat

Gode resultat for ryttarane på landsmeisterskap

I helga var det landsmeisterskap i sprang i Drammen. Seljord ridegruppe stilte med åtte hestar og seks ryttarar frå Seljord, Morgedal og Notodden.

Styreleiar i ridegruppa, Gunn Helga Vindfjell, rosar ryttarane.

– Me er veldig fornøgde med innsatsen. Dei trenar mykje, og er så flinke, fortel ho.

Fjortenåringen Lone Isabell Berget gjorde det aller skarpast. Ho kjem frå Notodden, men er medlem av ridegruppa i Seljord. Saman med ponnien Al-Ahmar Sherdil tok ho ein samanlagt andreplass i sin klasse.

Even Vindfjell (16) og ponnien Trendy Captains Dream frå Seljord var litt uheldig i sin fyrste runde, men leverte så to feilfrie rundar og fekk sløyfe for innsatsen.

Det vart også fleire fine plasseringar, men det var også ei oppleving å vere på landsmeisterskapen, og mellom anna sjå på andre meir erfarne ryttarar.

– Det er eit fantastisk anlegg, Noregs flottaste spranganlegg så det var også moro å vere der, seier Vindfjell.

Dedikert: Even Vindfjell og Trendy var litt uheldig i sin fyrste runde, men leverte så to feilfrie rundar og fekk sløyfe for innsatsen. Foto: Privat

Dedikerte

Vindfjell fortel at ridegruppa i Seljord er svært aktiv med dedikerte ryttarar som trenar mykje.

– Me har mykje rekruttering, og det er på grunn av hestesenteret. Dei byrjar å ri aktivt på rideskulen når dei er 12-13 år gamle. Dei er gode på å få fram gode ponniryttarar, og etter kvart er det nokon som er så heldige å få sin eigen hest å ri, fortel ho.

Av gruppa som var med på landsmeisterskapen i helga var det ryttarar både frå Seljord, Morgedal og Notodden.