I verdstoppen: Runar Skaug Mathisen har etablert seg i toppen, men må nå ta ein liten pause. Foto: Privat

Blei sjuk etter kjempeløpet i Italia, men satsar på å vera tilbake i Vasaloppet

Runar Skaug Mathisen nærmar seg sesongens mål om å vera blant dei ti beste i eit langløp. Neste sjanse er det prestisjetunge Vasaloppet, men fyrst må han bli kvitt forkjølelsen.

– Dei seier det tek akkurat ein månad frå dei fyrste symptoma kjem til ein er tilbake der ein var. Slik sett skal det akkurat gå.

Runar Skaug Mathisen frå Vinje mistar ikkje motet av å ha blitt forkjølt kort tid etter å ha gått inn til karrierebeste med 14.-plass i Marcialonga i Italia førre helg. Han måtte stå over helgas langløp i Seefeld, men milslukaren har kontroll på terminlista og forma.

– Eg føler eg har relativt god tid, seier han til VTB på telefon frå Toblach der han var med laget sitt Team Parkettpartner Sjusjøen og førebudde seg til rennet i Austerrike.

Heldt halve bakken

Han var nær ved å gjera det heilt store i Marcialonga, men måtte gje seg halvvegs i den siste bakken.

– Bakken er i utgangspunktet bratt, men han er desto brattare etter å ha gått i 68 kilometer. Det var ein skikkeleg posisjonskamp og eg låg som nummer to. Eg gav det eg hadde, men måtte gje meg halvvegs. Det er lengre enn eg har klart tidlegare, så neste år kanskje eg klarer 2/3, seier Mathisen.

Han set 14.-plassen ein del høgare enn 19.-plassen i Marcialonga for to år sidan.

– Breidda i langløp er mykje større no, forklarar vinbyggjen.

– Dette var bra, men ikkje perfekt, legg han til.

Før sesongen sette han seg mål om å vera blant dei 20 beste i alle renna han deltok i, i tillegg til ein plassering blant dei 10 beste. Det har han klart – nesten. Han har 14., 15. 21. og 22.-plass i dei fire konkurransane han har deltatt i.

– Sesongen er berre halvvegs, seier han.

Artikkelen held fram under annonsen.

– Kor mykje blir du sett tilbake av sjukdom som nå?

– Det påverkar ein del. Men om ein månad skal eg vera tilbake i forma eg var i før eg blei sjuk, seier 27-åringen.

Trivst med langløp: – Alt under tre mil er sprint, gliser Runar Skaug Mathisen. Foto: Privat

Trivst med langløp

For nokon år sidan tok Mathisen valet om å satse på langløp i staden for vanleg distanserenn. Han har framleis femmila i NM for to år sidan som sitt førebelse høgdepunkt, men lengtar ikkje tilbake til «vanleg» langrenn.

– I langløp er det mykje ein må vera god på. Det er mange taktiske val ein må ta undervegs. Om ein slurvar med næring kan det utgjera mange plassar. Og så er det fint å få reist mange plassar i Europa, seier Mathisen.

– På ein 15-kilometer må ein gå det ein klarer og så sjekke resultatlista etterpå, legg han til.

Han er relativt ung blant langløparane.

– Eg blei fødd same året (1993) som Anders Aukland debuterte på Beitostølen, seier Mathisen med eit smil.

Aukland er framleis aktiv, men var nokon plassar bak Mathisen i Marcialonga.

– Men han blir skummel i Vasaloppet. Du kan aldri avskrive Anders Aukland, seier Mathisen.

Vasaloppet er langløpet som passar Mathisen best.

Artikkelen held fram under annonsen.

NM på heimebane

Fyrste del av noregsmeisterskapen i langrenn blei arrangert på Konnerud i helga. Seinare i vinter ventar del 2 på Lillehammer der Mathisen har budd dei siste sju åra. Vinbyggjen stiller til start på femmila på heimebane.

– Det er lettvint når det er så nærme, men eg er eigentleg litt ferdig med sprint, seier Mathisen lurt.

– Sprint?

– Alt under tre mil er sprint, gliser han som best trivst når det er 8–9 mil og meir enn tre timar på ski.

Les også
«Som regel er det eit slit frå halvgått løp og til mål. No hadde eg krefter att mot slutten»
Ser mot Vasaloppet: Runar Skaug Mathisen ser no fram mot Vasaloppet. Foto: Privat