Nordbø på 6. plass i sommar-NM

Tre skiskyttarar frå Vest-Telemark stilte på startstreken i rullski-NM i Mo i Rana i helga.

Even Nordbø gjorde det best. Fyresdølen blei nummer 6 på laurdagens sprint. Han bomma totalt fire gonger på dei to skytingane og var 1 minutt og 22 sekundar bak Sindre Pettersen frå Nittedal som blei sommarnoregsmeister. På sundagens jaktstart gjekk Nordbø inn til 14. plass i M18-klassa der kring 40 skiskyttarar var påmeldt.

Bendik Aketun, Fyresdal IL, deltok i M20/21. Han blei nummer 18 laurdag og gjekk seg opp ein plass på sundagens jaktstart. Aketun går no for Team Statkraft Lillehammer, i tillegg til å representere Fyresdal IL.

Torjus N. Fossli, Fyresdal IL, går i M17-klassa i år. I Mo i Rana reiste han heim med 25. og 21. plass frå dei to konkurransane i helga.