Trur på automatisk trafikkontroll i tunnelen

Ordførar i Seljord Beate Marie Dahl Eide (Sp) har stor tru på at det no vert innført gjennomsnittsmåling i Mælefjelltunnellen.

Ho er svært glad for signala som kom frå samferdselsminister Knut Arild Hareide på Dagsnytt 18 på NRK måndag. Der trekte Hareide konkret fram ein stad, nemleg Mælefjelltunnellen, som ein aktuell stad å bruke såkalla streknings-ATK.

– Dette lovar veldig bra. Statsråden var godt oppdatert på ekstremkøyringa i tunnelen og hadde tydelegvis lese innspela han har fått frå oss, seier Eide.

Ordføraren seier ho har stor tru på at det no kjem på plass automatisk trafikkontroll, og at ein kan få bukt med ekstremkøyringa før liv går tapt.

Det er blitt målt fleire bilførarar i hastigheiter rundt 130–140 kilometer i timen kvar veke, og enkelte opp i 200 kilometer i timen.

– Dette kan snart ende i tragedie om det ikkje tek slutt, seier ein bekymra ordførar.

– Å få innført gjennomsnittsmåling et det mest konkrete og effektive verkemiddelet ein har for å redusere fart og skadde og drepne i trafikken. Me håpar ministeren sine signal raskt vil føre til at vi får dette på plass i tunnelen vår, held ho fram.

I januar vedtok formannskapet i Seljord å be Samferdselsdepartementet snarast gje løyve til å innføre streknings-ATK (gjennomsnittsmåling) i Mælefjelltunnelen.

I ettertid har dette blitt støtta frå fylkestrafikksikerheitsutvalet i Vestfold og Telemark fylkeskommune og Hjartdal kommune. Politiet og Statens vegvesen har saman med kommunen ynskt dette heile tida.