Ny leiar: Stine Brekka Skoland frå Seljord skal leie Nav Midt-Telemark. Foto: Naviga Support

Stine Brekka Skoland skal leie Nav Midt-Telemark

Etter 18 år i Røde Kors er Stine Brekka Skoland frå Seljord klar til å leie Nav Midt-Telemark.

Det melder Nav i ei pressemelding.

– Eg har høyrd mykje bra om Nav-kontoret i Midt-Telemark og ser fram til å starte. Det blir spennande å jobbe i offentleg sektor, og eg gler meg til å bli kjent med nye folk, og til å ta fatt på mange viktige samfunnsoppgåver, seier den nye Nav-leiaren

Ho kjem frå jobben som dagleg leiar i Telemark Røde Kors. Tidlegare har ho vore assisterande leiar, økonomiansvarleg og frivilligkoordinator i organisasjonen.

– Det blir veldig rart å bytte miljø og kollegaer etter så mange år, men eg gler meg til å gjera noko nytt. Røde Kors har alltid behov for frivillige, så eg kan heldigvis halde fram med å bidra i organisasjonen. Det er sjeldan ein sluttar heilt i Røde Kors, seier Skoland.

I Telemark Røde Kors har ho leia 19 medarbeidarar og koordinert eit høgt tal frivillige aktivitetar. I Nav Midt-Telemark skal ho leie eit NAV-kontor med 45 medarbeidarar som ivaretar Nav-tenester til brukarane i Midt-Telemark og Nome. Oppstartsdato er ikkje sett. Tore Prestrud Aastad fungerer som leiar til Skoland byrjar i jobben.

Stine Brekka Skoland er 46 år og er utdanna innan økonomi og leiing. Ho er opphavleg frå Bamble, men då ho møtte mannen sin, Knut Inge, gjennom Røde Kors, flytta ho til Seljord. I Seljord har dei saman tre unge jenter og ein hund, kjem det fram i pressemeldinga.