Smitteverntiltak også i jula – men du kan ha inntil ti gjester på julaftan

Regjeringa held oppe tilrådinga om at ein kan ha inntil fem gjester til over nyttår, men opnar for unntak på inntil ti gjestar to gonger i jula.

– Jula er ei tid for nærleik, ikkje avstand. Vi vil at alle skal få feire jul med så mange som mogleg av dei ein ønskjer rundt seg. Det fortener vi, ikkje minst i år, sa statsminister Erna Solberg (H) på pressekonferansen til regjeringa om koronasituasjonen onsdag.

Men det ligg ei bekymring for at julefeiringa skal føre til meir smitte i samfunnet.

– Vi ønskjer ikkje å starte det nye året med stigande smittetal og nye innstrammingar i januar. Det vil ingen av oss, sa Solberg.

Derfor meiner regjeringa at det er nødvendig med smitteverntiltak også i jula. Men det blir lempa på nokre tiltak for at folk skal kunne feire jul og nyttår litt meir som normalt.

Inntil ti gjestar

Hovudregelen er at ein avgrensar talet på menneske ein har sosial kontakt med gjennom heile jule- og nyttårsperioden, og ikkje minst i førjulstida.

Regjeringa held derfor oppe tilrådinga om at ein kan ha inntil fem gjester til over nyttår, men opnar for inntil ti gjestar på to av dagane.

– Det betyr altså inntil ti gjester på julaftan og inntil ti gjestar på nyttårsaftan, eller to andre dagar som ein vel sjølv i perioden, seier Solberg.

Ho minte òg om at alle må halde minst éin meters avstand til dei ein ikkje bur saman med.

– Avstandsreglane gjeld gjennom heile selskapet. Frå gløggen blir servert til ein set seg til bords. Når gåvene blir delte ut. Og når kaffien og julekakene kjem fram.

– Må tenkje sjølv

For sjølv om det blir lempa litt på reglane, må ein framleis tenkje smittevern.

– Det er ikkje godt smittevern viss ein sjølv har selskap julaftan, og dagen etter er i selskap med ti andre personar hos nokon andre, for så å møte ti nye personar den tredje dagen, seier Solberg.

Og til studentar som reiser heim til jul og som lurer på om dei er ein del av husstanden, kom statsministeren med ein hyggjeleg beskjed.

– Skal ein bu saman, så er ein ein del av den husstanden. Kjem du heim til jul, som eg håpar barna mine gjer denne jula, så blir dei ein del av husstanden.

Bekymra for importsmitte

Det blir framleis tilrådd å unngå unødvendige reiser innanlands og utanlands, men regjeringa er klar over at reiser i jula for mange kan seiast å vere nødvendige.

– Alternativet ville vore ei jul utan familien, seier Solberg.

Ho seier det er greitt å reise på hytta, så lenge ein følgjer dei gjeldande reglane for reise og sosial kontakt, men understreka at dette ikkje er jula for å reise utanlands – med mindre du verkeleg må.

– Vi veit at mange vanlegvis bruker juleferien til å besøkje familie som bur i andre land. Bekymringa mi er at dei som vel å reise ut, bringar med seg smitte tilbake. Derfor vil eg på det sterkaste minnet om karantenereglane.

– Barn må få vere barn

Utdanningsminister Guri Melby (V) presiserte på pressekonferansen at barn må få lov til å vere barn, og sa at det er lov til å møte klassekameratar, også i romjula.

– Men kanskje er det best å fokusere på utandørsaktivitetar. Er vi heldige får vi snø, og småungane kan ake eller lage snømann saman. Det er smittevernvennlege aktivitetar.

– For ungdommane blir det nok ikkje den store romjulsfesten 2. juledag. Men det er mogleg å samle nokre få venner, og kanskje kan ein samlast rundt eit bål ute, sa Melby.

Også statsministeren kom innom barn og unge i talen sin. Ho minte om at foreldre ikkje må gløyme at dei er dei viktigaste personane i livet til barna sine, også ungdommen.

– Og la meg presisere: Barn og unge med skilde foreldre bør få samvær med begge foreldra sine, som normalt, gjennom juleferien.