Over 300 elevar på Tinestafetten. – Det er gøy å ha ein litt unormal dag
Fredag var elevar frå seks skular samla i Høydalsmo for å delta på årets Tinestafett. Gjennom dagen fekk elevane prøve seg i fleire friidrettsøvingar før arrangementet vart avslutta med stafett.
Publisert
Tinestafetten er for elevar frå 6. til 9. klasse. I år var elevar frå Åmot, Rauland, Øyfjell, Kviteseid, Tokke og Høydalsmo representerte.
Elevane konkurrerte i mellom anna kast med liten ball, kulestøyt, 60-meter, lengdehopp og høgdehopp.
Fleire positive sider
Lærar Trine Lothe ved Høydalsmo skule har i mange år vore engasjert i arrangementet, og er den som har koll på organiseringa.
Ho fortel at arrangementet går relativt greitt å gjennomføre, sjølv om det krev noko arbeid.
– Me har gode rutinar på korleis me skal gjera ting, sidan me har gjort det så mange gonger.
Annonse
Ho understrekar også at 10.-klassingane ved skulen er avgjerande for å få dagen til å gå i hop.
– Dei fylgjer klassene rundt på dei ulike øvingane og registrerer resultata.
Trine meiner arrangementet har fleire positive sider.
– Det er ein fin måte å få inn litt friidrett på. Då kan ein øve i forkant og møtast her og konkurrere. Så er det fint at alle skulane kan samlast til eit felles arrangement. Målet er at det skal vere ein positiv dag, seier ho.
Moro med ein annleis dag
For 6. klasse ved Tokke skule var årets Tinestafett den fyrste. Elevane var tydeleg nøgde med dagen og fortalde at dei hadde sett fram til arrangementet.
– Det er veldig gøy, seier dei.
Ludvig Tøndel Solli meiner noko av det beste er at dagen skil seg frå den vanlege skulekvardagen.
– Det er gøy å ha ein litt unormal dag, seier han.
Medan nokre elevar hadde trena lite, fortalde Tokke-elevane at dei hadde lagt ned ein del innsats.
Annonse
– Me har trena sidan i fjor, seier Malin Hegglid Gjerlid.
Også 6. klasse ved Øyfjell skule deltok på Tinestafetten for fyrste gong. Dei synest dagen var morosam.
– Det er bra fordi du kan bruke musklane, og det er veldig sosialt at nesten alle skulane kjem hit og har konkurransar, seier Heine Vinjerui Bergland.
Elevane fortel at alle hadde øvd litt på dei ulike øvingane, og litt ekstra på dei øvingane dei sjølve kulle delta i.
Ylva Djuve og Maiken Betten frå 7. klasse ved Høydalsmo skule var heller ikkje i tvil om kva dei meinte om arrangementet.
– Det er kjempeartig, seier Maiken.
Ylva set pris på at skulen legg til rette for slike dagar.
– Det er fint at skulen steller i stand slike aktivitetar for oss, seier ho med eit smil, før dei må haste vidare til neste konkurranse.
Annonse
