Meteorologane åtvarar: – Farevarsel over heile landet

Bøttevis med nedbør i sør, isproblem i nord og kraftig vind både i sør og nord. Eit stormsenter i havet i vest set sitt preg på vêret dei neste dagane.

«Gjør dere klare for full pakke fra kong vinter!», lydar åtvaringa frå Meteorologisk institutt på Twitter.

Stormsenteret som byggjer seg opp, fører til at det tysdag vart sendt ut ulike farevarsel på moderat nivå for store delar av landet.

I Sør-Noreg er det venta store mengder nedbør. Nokre stader kan det bli opp mot 40 centimeter snø, medan det meste av nedbøren langs kysten kjem som regn. Det er særleg dei som skal ut å køyre, som blir bedne om å vere varsame.

I Agder og i Rogaland er det dessutan venta mykje vind frå natt til torsdag. Det kan bli liten eller full storm på kysten med lokale vindkast på 28–33 m/s innover land, heiter det i varselet for Rogaland.

Også i Nord-Trøndelag, Nordland og Troms er det varsla kraftige vindkast torsdag, medan det for dei nordlegaste delane av landet blir åtvara om fare for ising på skip.

(©NPK)