Meiner kommunen kan ta imot 15 flyktningar i år

Fyrstkomande tysdag skal kommunestyret bestemme kor mange flyktningar Tokke kommune skal busette i løpet av året. Dei siste åra har det vore stort behov for å busette flyktningar i kommunane. Sidan 2022 har Tokke busett 103 flyktningar – 52 i 2022, 35 i 2023 og 16 i 2024 (14 færre enn vedtaket).

I saka til politikarane får me vite at dei fleste kjem frå Ukraina, men at det også har kome personar frå Kongo og Eritrea. Av dei 103 bur 78 framleis i Tokke.

Det er Integrerings- og mangfaldsdirektoratet (IMDi) som oppmodar kommunane om å busette eit visst tal flyktningar, og dei oppmodar nå Tokke om å busette 20 personar i 2025. Kommunedirektøren rår politikarane til å redusere talet til 15. Men legg også til at om busettingsbehovet i Noreg skulle auke i 2025 vil ein vurdere om kommunen kan busette fleire.