Martine (12) og Ingeborg (9) inviterte til kjeppheststemne

Laurdag inviterte Martine Pedersen (12) og Ingeborg Lykseth Botnen (9) til kjeppheststemne i Kviteseid for fyrste gong. På banen var det sett opp ei skikkeleg hinderløype som kjepphestryttarar i alle aldrar kunne bryne seg på. 

– Ein leikar jo at det er ein ekte hest. Me startar lågt, og så går me høgare og høgare, gliser Martine, som fekk sin fyrste kjepphest då ho var tre år.

Mykje billigare enn ekte hest 

Martine og Ingeborg er klare på kvifor kjepphest er ålreit å drive med. Ikkje berre er det mykje billigare enn ein ekte hest, men også god trim. 

– Det er slitsamt å hoppe, seier dei og pustar tungt i den steikande varmen. 

På spørsmål om dei ynskjer å arrangere fleire slike treff i Kviteseid kjem svaret kjapt.

– Tusen millionar prosent!

Likevel er dei nok også neste gong avhengige av mødrene sine Regine Heimdal og Marte Lykseth for å realisere planane. 

– Og me må takke Kviteseid Fram for stønad til dette arrangementet, seier Regine Heimdal. 

Det var mange kjepphestar til utlån samt gratis mat, drikke og sløyfe til alle deltakarar. 

Nye bygdegutar

Det er ikkje slik at kjepphest berre er for jenter. Benjamin Bognø (4) fekk saman med veslebror Mikkel (3) og far Simon (39) låne kvar sin kjepphest. Dei flytta til Høgvoll i Kviteseid for berre ein månad sidan.

– Så langt trivst me veldig godt, seier Simon Bognø. Når han ikkje er på kjeppheststemne jobbar han som designar i betalingstenesta Vipps.