KS meiner regjeringa nedprioriterer fylkesvegane

KS er overraska og skuffa over det dei karakteriserer som manglande satsing på fylkesvegane i statsbudsjettet.

– Manglande satsing på fylkesvegane er både overraskande og skuffande når statsråden så tydeleg tar til orde for godt vedlikehald og eit trygt fungerande vegnett som kan brukast i mange år, seier Gunn Marit Helgesen i KS, organisasjonen til kommunesektoren, i ei pressemelding.

Nye kartleggingar viser at vedlikehaldsetterslepet på fylkesvegane er rundt 100 milliardar kroner. Ekstremvêr som følgje av klimaendringar krev òg meir sikring mot flaum, ras og skred.

Regjeringa foreslår å auke løyvingane til NVEs arbeid med å førebyggje flaum- og skredfarar med 220 millionar kroner, der 150 millionar skal gå til hastetiltak etter ekstremvêret Hans.

– KS har lenge etterlyst eit varig taktskifte i førebyggjande flaum- og skredsikring. 70 millionar er ein forsiktig start som vi håpar blir forsterka i Stortinget, seier Helgesen.

(©NPK)