Konfirmantar og kyrkjelydar i Vest-Telemark samla inn 155 000 kroner
I tillegg til dei 155 000 kronene er det også samla inn til Kirkens Nødhjelps Fasteaksjon på Vipps. Dette resultatet kjem ikkje før i juni.
Det opplyser prostidiakon Eilev Erikstein til VTB. Han meiner Fasteaksjonen syner at det ikkje er slutt på kontantane.
– Når folk verkeleg vil støtte noko, slik som Fasteaksjonen, gjev folk det dei har. Gjennom bøsseaksjonen får ein mange gode møte i døra, ikkje minst – det er ein god grunn til å halde på den gode og gamaldagse dør-til-dør-aksjonen, seier Erikstein.
Artikkelen held fram under annonsen.
Rekna ut frå tidlegare Fasteaksjonar kjem 2 av 3 kroner i kontantar, resten frå Vipps.
– Så er det berre å takke alle som på ein eller annan måte stiller opp. Anten det er med bøsse, som sjåfør, kaffikokar eller oppteljar. Kjapt rekna er 150 menneske aktive gjennom Fasteaksjonen, fortel prostidiakonen.
– For konfirmantane er dette ei diakonal oppgåve. Det er ein viktig læringsarena at det gjer godt å gjere ein innsats for andre og å dele med seg, legg han til.
Fasteaksjonen er ein av landets største bøsseaksjonar og har blitt arrangert sidan 1967. I fjor blei det samla inn totalt 35 millionar kroner i Noreg. Så langt i år er talet 21 millionar.
Fasteaksjonen
| Tokke | 35 000 |
| Vinje | 40 000 |
| Fyresdal | 23 000 |
| Nissedal | 17 000 |
| Kviteseid | 25 000 |
| Seljord | 15 000 |
