Innandørs arrangement med over 500 deltakarar blir forbode

Innandørs arrangement med over 500 deltakarar blir heilt forbode frå onsdag, opplyser helsedirektør Bjørn Guldvog.

Dette blir gjort med heimel i smittevernlova.

– Vi har fått tilbakemeldingar frå fleire kommunar og kommunelegar som har bede om klarare råd. Derfor innfører vi no forbod mot store arrangement. Dette gjer vi òg for å lette arbeidstrykket i kommunane, sa helsedirektøren på ein pressekonferanse med helseminister Bent Høie (H) og direktør for Folkehelseinstituttet Camilla Stoltenberg onsdag.

Vedtaket gjeld frå onsdag og ut april månad. Når det gjeld mindre arrangement, må kommunane gjere eigne risikovurderingar.

– No er jobb nummer éin å avgrense spreiing av smitta, slår Guldvog fast.