– Hadle snakka med alle i bygda, og alle i bygda snakka med Hadle

Hadle Hovda sat ofte på ein benk ved sekskanten i Kviteseidbyen, og slo av ein prat med dei som kom forbi.

Etter at Hovda døydde i januar var ein gjeng samla på Waldenstrøm kafe. Der kom ideen om at denne staden i sentrum, som så mange forbind med Hovda, burde få namnet Hadle Hovdas plass.

Einar Søreide gjekk rett til ordførar Tarjei Draugedal og presenterte ideen.

– Og som den spontane og positive fyren han er sa han ja til det med det same, og bestilte eit skilt, fortel Søreide.

Skiltet synte Søreide og Draugedal fram på bygdekvelden som Kviteseid mållag arrangerte på Sundvang kulturhus fredag.

Laurdag føremiddag var dei to på plass i Kviteseid sentrum der dei skrudde opp skiltet ved sekskanten.

Til stades var også sonen til Hadle, Ingar Hovda. Og etter at skiltet var vel oppe tok dei tre seg ein kvil på benken i Kviteseidbyen.