Ringrev: Stian «Staysman» Thorbjørnsen skal saman «med venene» opptre på Treungenfestivalens siste dag. Foto: Geir Ufs

Festivalsjefen håpar gjestene kan ta med seg meir heim enn berre gode minne

Staysman, Vassendgutane, TIX og Luxus Leverpostei er blant trekkplastera på årets Treungenfestival – den 20. i rekka.

Neste månad er det 20 år sidan Jørgen Solberg booka den fyrste artisten til den fyrste utgåva av Treungenfestivalen. No er han kome hakket lenger i planleggingsprosessen.

– Me kan melde om svært bra sal siste par månadene, det ligg an til ei fantastisk feiring i Treungen, utruleg at det fyrste bandet blei booka i juni 2002 og me framleis held på så mange år etterpå, seier festivalsjefen.

Utruleg: Jørgen Solberg gler seg til å feire 20-årsjubileum. – Utruleg at me held på etter så mange år, seier festivalsjefen. Foto: Geir Ufs

Staysman har hatt æra av å avslutte festivalen fire gonger tidlegare, og tek på ny til scena under festivalens siste dag. Han har tidlegare hylla Treungenfestivalen som «verdens minst jålete festival, men samtidig verdens fineste». I tillegg til Staysman «med vener», vil Trygve Skaug, Vazelina Bilopphøggers, Myra Granberg og Halva Priset også spele på festivalen siste dag, laurdag 6. august.

Dei tre føregåande dagane har også fleire festival-vener på programmet; Vassendgutane, E-type og Luxus Leverpostei opptrer alle torsdag, før TIX, Stavangerkameratene, Rotlaus, Plumbo og Rune Rudberg tek til scena fredagen.

Soppgirobygget og Hagle spelar på opningsdagen, onsdag.

Fem artistar har enno ikkje blitt offentleggjorde, éin for kvar av dagane onsdag, fredag og laurdag, medan to namn manglar på torsdagens program. Solberg seier dei siste namna vil bli offentleggjorde i løpet av mai og juni.

Artikkelen held fram under annonsen.

Det er ikkje berre det musikalske som festivalsjefen ser fram til under årets festival, han håpar også å legge til rette for at gjestene kan ta med seg meir heim frå festivalen enn berre gode minne.

– Singelgruppa har vakse til 2 200 medlemmar. Det blir kjærleik no. Folk treng å treffast i ein ekte Treungen-setting og denne festivalen skil seg ut.

2003: Festivalsjef Jørgen Solberg var nøgd med den andre Treungenfestivalen. Foto: Tone Tveit