Fekk løyve til motorferdsel i fjellrevprosjekt

Tilsynsutvalet for Hardangervidda, Telemark, er positiv til at Norsk institutt for naturforsking får bruke snøskuter og helikopter i nasjonalparken på Hardangervidda i 2020.

Med heimel i paragraf 48 i naturmangfaldlova gjev tilsynsutvalet dispensasjon til at det vert køyrt i inntil tre dagar med éin snøskuter ved feltarbeid i fjellrevprosjektet, i den delen av nasjonalparken på Hardangervidda som ligg i Telemark, i tidsrommet 15. januar–30. april 2020. Det vert gjeve løyve til å lande inntil éin gong med helikopter til det same formålet i tida 1. mai–10. oktober 2020. Det er ein føresetnad at motorferdsla skal reduserast til eit minimum.

I samsvar med det som har vore praksis hittil føresett tilsynsutvalet at Staten naturoppsyn skal stå for den vanlege drifta av prosjektet.

Artikkelen held fram under annonsen.

Éin gong: Norsk institutt for naturforsking får løyve til å lande éin gong i tida 1. mai–10. oktober 2020 i samband med eit fjellrevprosjekt.

I saksutgreiinga skriv tilsynsutvalet mellom anna fylgjande:

«Det fylgjer av paragraf 8 i naturmangfaldlova at ved vurdering av søknadar om motorferdsel i nasjonalparken skal det leggjast til grunn vitskapleg kunnskap om verknaden på det biologiske mangfaldet. Det er ein føresetnad at samla belastning på økosystemet skal avgrensast. Menneskeleg ferdsel påverkar naturen negativt. Ikkje minst gjeld dette for villreinen. Motorferdselen medverkar utan tvil til å auka denne påverknaden. Gjennom arbeidet med verneforskrifta og fastsetjing av forvaltingsplan, er det allereie gjort ein viss avveging mellom naturleg mangfald og verneverdiar og bruk av motorisert ferdsel. Den transporten det er søkt om her gjeld eit prosjekt som skal styrkja eit element i det biologiske mangfaldet i nasjonalparken. Tilsynsutvalet har difor vurdert det slik at skadeverknadane ikkje er større enn at dei kan forsvarast av nytten av å få utført transporten.»

Elles set tilsynsutvalet vilkår om at all motorferdsel i fjellrevprosjektet skal loggførast med alle datoar og køyrde kilometer i nasjonalparken kvar dag. Køyring i medhald av løyve etter vernereglane er ikkje lovleg før det i tillegg er innhenta samtykke frå grunneigarane på den aktuelle strekninga (privat rett).

Løyvet gjeld også for den strekninga som ligg på utsida av nasjonalparken, gjeve med heimel i motorferdselslova med forskrifter.

Les også
I fjellrevens rike – forhåpentlegvis